മോശം കാലാവസ്ഥയെ തുടർന്ന് അടിയന്തര ലാൻഡിങ്ങ് ; സിംഗപ്പൂർ എയർലൈൻസ് വിമാനത്തിൽ ഒരു മരണം; നിരവധി പേർക്ക് പരിക്ക്

ബാങ്കോക്ക് : ലണ്ടനിൽ നിന്നും സിംഗപ്പൂരിലേക്ക് യാത്ര ചെയ്യുകയായിരുന്നു സിംഗപ്പൂർ എയർലൈൻസ് വിമാനത്തിന് മോശം കാലാവസ്ഥയെ തുടർന്ന് അടിയന്തര ലാൻഡിങ് നടത്തേണ്ടിവന്നു. അടിയന്തര ലാൻഡിങ്ങിനിടെ വിമാനത്തിൽ ഉണ്ടായ പ്രക്ഷുബ്ധതയെ തുടർന്ന് ഒരാൾ മരിക്കുകയും നിരവധിപേർക്ക് പരിക്കേൽക്കുകയും ചെയ്തു. നിയന്ത്രണം നഷ്ടപ്പെട്ട രീതിയിൽ വിമാനം ആടിയുലഞ്ഞതാണ് ഒരാളുടെ മരണത്തിനും നിരവധി പേർക്ക് പരിക്കേൽക്കാനും ഇടയാക്കിയത്.

സിംഗപ്പൂർ എത്തുന്നതിനു മുൻപേ ഉണ്ടായ മോശം കാലാവസ്ഥയെ തുടർന്ന് സിംഗപ്പൂർ എയർലൈൻസ് വിമാനം തായ്‌ലൻഡിൽ ആണ് അടിയന്തര ലാൻഡിങ് നടത്തിയത്. ലണ്ടനിലെ ഹീത്രൂ വിമാനത്താവളത്തിൽ നിന്നും പുറപ്പെട്ട SQ321 എന്ന വിമാനമാണ് തായ്‌ലൻഡിന്റെ തലസ്ഥാനമായ ബാങ്കോക്കിലെ സുവർണ്ണഭൂമി വിമാനത്താവളത്തിൽ അടിയന്തര ലാൻഡിങ് നടത്തിയത്.

അടിയന്തര ലാൻഡിങ്ങിനെ തുടർന്നുണ്ടായ അപകടത്തിൽ വിമാനത്തിലെ യാത്രക്കാരായിരുന്ന 30ലേറെ പേർക്ക് പരിക്കേറ്റതായി തായ് മാദ്ധ്യമങ്ങൾ റിപ്പോർട്ട് ചെയ്യുന്നു. സിംഗപ്പൂർ എയർലൈൻസിന്റെ ബോയിംഗ് 777-30ER വിമാനത്തിൽ 211 യാത്രക്കാരും 18 ജീവനക്കാരും ആയിരുന്നു ഉണ്ടായിരുന്നത്. വിമാനത്തിലെ എല്ലാ യാത്രക്കാർക്കും ജീവനക്കാർക്കും സാധ്യമായ എല്ലാ സഹായവും ചെയ്യുമെന്നും അതിനായി പ്രത്യേക ടീമിനെ ബാങ്കോക്കിലേക്ക് അയച്ചിട്ടുണ്ട് എന്നും സിംഗപ്പൂർ എയർലൈൻസ് വ്യക്തമാക്കി.