ഡല്‍ഹി: കേന്ദ്രസര്‍ക്കാര്‍ മുത്തലാഖ് നിരോധിക്കുന്നതിന് തയ്യാറാക്കിയ കരടുബില്‍ കേന്ദ്രമന്ത്രിസഭ ഇന്നു പരിഗണിച്ചേക്കും. മുത്തലാഖ് ജാമ്യമില്ലാക്കുറ്റമാക്കാനും മുത്തലാഖിലൂടെ വിവാഹമോചനം ചെയ്താല്‍ പുരുഷന് മൂന്നുവര്‍ഷം വരെ തടവ് ശിക്ഷ നല്‍കാനും വ്യവസ്ഥ ചെയ്യുന്ന ബില്ലാണ് കേന്ദ്ര മന്ത്രിസഭയുടെ പരിഗണനയ്ക്ക് വരുന്നത്. ബില്‍ തയ്യാറാക്കുന്നതിന് നേരത്തെ മന്ത്രിസഭാ ഉപസമിതിയ്ക്ക് രൂപം നല്‍കിയിരുന്നു.
വാക്കാലോ രേഖാമൂലമോ, ഇമെയില്‍, എസ്എംഎസ്, വാട്ട്‌സ്ആപ് തുടങ്ങിയ സന്ദേശസംവിധാനങ്ങളിലൂടെയോ ഒറ്റത്തവണ മുത്തലാഖ് ചൊല്ലി വിവാഹമോചനം നേടുന്നത് നിയമവിരുദ്ധമാണെന്ന് ബില്‍ വ്യക്തമാക്കുന്നു. ബില്ല് ഇന്ന് തുടങ്ങുന്ന പാര്‍ലമെന്റിന്റെ ശൈത്യകാലസമ്മേളനത്തില്‍ തന്നെ അവതരിപ്പിക്കും.
ഓഗസ്റ്റ് 22 നാണ് സുപ്രിം കോടതിയുടെ അഞ്ചംഗ ഭരണഘടനാ ബെഞ്ച് മുത്തലാഖ് താത്കാലികമായി റദ്ദാക്കിയത്. ആറ് മാസത്തിനകം മുത്തലാഖ് നിരോധിക്കുന്നതിന് കേന്ദ്രസര്‍ക്കാര്‍ നിയമം കൊണ്ടുവരണമെന്നും കോടതി നിര്‍ദ്ദേശിച്ചിരുന്നു. ഇതിന്റെ അടിസ്ഥാനത്തിനാണ് കേന്ദ്രസര്‍ക്കാര്‍ പുതിയ നിയമം കൊണ്ടുവരുന്നത്.
Discussion about this post