തിരുവനന്തപുരം: പൂന്തുറയില്‍ പ്രധാനമന്ത്രിയുടെ ഹിന്ദിയിലുള്ള പ്രസംഗത്തിന്റെ പരിഭാഷയില്‍ പിശകുകള്‍ കടന്നു കൂടി.. സംസ്ഥാന സര്‍ക്കാര്‍ പരിപാടിയായതിനാല്‍ സര്‍ക്കാര്‍ തന്നെയാണ് പരിഭാഷകയേയും ചുമതലപ്പെടുത്തിയിരുന്നത്. പ്രധാനമന്ത്രി പറഞ്ഞതില്‍ പലതും പരിഭാഷക പറയാതിരിക്കുകയോ തെറ്റി പറയുകയോ ചെയ്തു.
കേരളത്തില്‍ നിന്നു പോയ മത്സ്യത്തൊഴിലാളികളില്‍ പലരും വിദേശ രാജ്യങ്ങളിലെത്തിയിരിക്കുകയാണെന്നും ഇവരുടെ കാര്യത്തില്‍ വിദേശകാര്യ മന്ത്രാലയം ഇടപെടുന്നുണ്ടെന്നും പ്രധാനമന്ത്രി പറഞ്ഞു. എന്നാല്‍ ഇത് പരിഭാഷക വിഴുങ്ങി. കേന്ദ്ര സര്‍ക്കാര്‍ ചട്ടങ്ങള്‍ക്കനുസരിച്ച് പരമാവധി സഹായം നല്‍കാം എന്നു പ്രധാനമന്ത്രി പറഞ്ഞപ്പോള്‍ അത് പരിഭാഷയില്‍ വിട്ടുപോയി. ഈശ്വരനോട് പ്രാര്‍ത്ഥിക്കുന്നു എന്ന് പ്രധാനമന്ത്രി പറഞ്ഞപ്പോള്‍ ഈശ്വരന്റെ പേരില്‍ നിങ്ങള്‍ക്കുറപ്പുതരുന്നു എന്നായി പരിഭാഷ. കേന്ദ്ര സര്‍ക്കാര്‍ എല്ലാ പരിശ്രമവും നടത്തുമെന്നു പറഞ്ഞപ്പോള്‍ അതൊഴിവാക്കി. സംസ്ഥാന സര്‍ക്കാരുമായി ചര്‍ച്ച നടത്തുമെന്ന് പറഞ്ഞപ്പോള്‍ പരിഭാഷയില്‍ അത് ജനപ്രതിനിധികളുമായി ചര്‍ച്ച നടത്തുമെന്നായി.ഇത് പ്രസംഗിക്കാനുള്ള സമയമല്ലെന്ന് പ്രധാനമന്ത്രി പറഞ്ഞപ്പോള്‍ ആഘോഷത്തിനുള്ള സമയമല്ലെന്നായിരുന്നു പരിഭാഷ.
പരിഭാഷ തെറ്‌റുകളിലൂടെ മുന്നേറിയപ്പോള്‍ കേന്ദ്രമന്ത്രിയും ഉദ്യോഗസ്ഥരും, ബിജെപി നേതാക്കളും അസ്വസ്ഥരായി. ഇതോടെ കേന്ദ്രമന്ത്രി പൊന്‍രാധാകൃഷ്ണനും പ്രധാനമന്ത്രിയുടെ പ്രൈവറ്ര് സെക്രട്ടറി സഞ്ജീവ് സിംഗ്‌ളയും ചേര്‍ന്ന് ബി.ജെ.പി നേതാവ് വി.മുരളീധരനോട് പ്രസംഗം പരിഭാഷപ്പെടുത്തണമെന്നഭ്യര്‍ത്ഥിച്ചു. അദ്ദേഹം വേദിയിലെത്തിയപ്പോഴേക്കും പ്രധാനമന്ത്രി പ്രസംഗവും അവസാനിപ്പിച്ചിരുന്നു.
Discussion about this post