കുട്ടികളെ തട്ടികൊണ്ടുപോകല് സോഷ്യല് മീഡിയയില് വ്യാജ പ്രചരണം നടത്തുന്നവര്ക്കെതിരെ ക്രിമിനല് കേസെടുക്കുമെന്ന് ദക്ഷിണമേഖലാ ഐജി മനോജ് എബ്രഹാം. അഞ്ചു വര്ഷം തടവ് ലഭിക്കാവുന്ന കുറ്റം ചുമത്തുമെന്നാണ് ഐജിയുടെ മുന്നറിയിപ്പ് . സോഷ്യല് മീഡിയയിലൂടെ പ്രചരിപ്പിക്കുന്നവയില് 99 ശതമാനം സന്ദേശങ്ങളും വ്യാജമാണ്. സംശയത്തിന്റെ പേരില് അതിക്രമത്തിന് ഒരുങ്ങുന്നവര്ക്കെതിരെയും നടപടി സ്വീകരിക്കുമെന്ന് ഐജി പറഞ്ഞു
കുട്ടികളെ തട്ടിക്കൊണ്ടു പോകുന്നുവെന്ന തരത്തില് സോഷ്യല്മീഡിയയില് പ്രചരിക്കുന്ന സന്ദേശങ്ങളില് ആശങ്കവേണ്ടെന്ന് മുഖ്യമന്ത്രി നിയമസഭയില് പറഞ്ഞിരുന്നു. ഇത്തരം സംഘങ്ങള് പ്രവര്ത്തിക്കുന്നതായി അന്വേഷണത്തില് തെളിഞ്ഞില്ലെന്നും മുഖ്യമന്ത്രി വ്യക്തമാക്കിയിരുന്നു. ആലപ്പുഴയില് മാത്രമാണ് കുട്ടിയെ തട്ടികൊണ്ടു പോകാന് ശ്രമം നടത്തിയതിന് ഒരു കേസ് രജിസ്റ്റര് ചെയ്തിട്ടുള്ളത്. കോഴിക്കോട് നടന്നത് കുട്ടിയുടെ കഴുത്തിലുള്ള മാല തട്ടിയെടുക്കാനുള്ള ശ്രമമായിരുന്നു. കഴിഞ്ഞ വര്ഷം 1,774 കുട്ടികളെ കാണാതായതില് 1,725 പേരെയും കണ്ടെത്താന് കഴിഞ്ഞു. സംഭവങ്ങളില് പിടിയിലായ 199 പേരില് 188 പേരും കേരളീയരാണെന്നും മുഖ്യമന്ത്രി രേഖാമൂലം സഭയില് അറിയിച്ചു. പൊലീസ് ജാഗ്രത പുലര്ത്തുന്നുണ്ടെന്നും ഭയാനകമായ ഒരവസ്ഥയും നിലവിലില്ലെന്നും മുഖ്യമന്ത്രി അറിയിച്ചിരുന്നു.
Discussion about this post