കണ്ണൂര്: മട്ടന്നൂരില് യൂത്ത് കോണ്ഗ്രസ് നേതാവ് ഷുഹൈബിനെ കൊലപ്പെടുത്തിയത് ജയിലില് നിന്നിറങ്ങിയ സംഘമെന്ന നിര്ണായക സൂചന പോലിസിന് ലഭിച്ചു. സിപിഎംലീഗ് സംഘര്ഷത്തെ തുടര്ന്ന് ജയിലിലായ സിപിഎം പ്രവര്ത്തകരെ കേന്ദ്രീകരിച്ചാണ് അന്വേഷണം പുരോഗമിക്കുന്നതെന്ന് മാതൃഭൂമി റിപ്പോര്ട്ട് ചെയ്യുന്നു. ഷുഹൈബിന്റെ കൊലപാതകത്തിനു ശേഷം ഈ കേസിലെ പ്രതികള് ഒളിവില് പോയതാണ് ഇത്തരം സംശയത്തിന് വഴിവെച്ചത്. ഇതേ തുടര്ന്ന് റിമാന്ഡ് പൂര്ത്തിയാക്കി പുറത്തിറങ്ങിയ ഇവരുടെ ജാമ്യം റദ്ദാക്കാനും പോലീസ് ആലോചിക്കുന്നുണ്ടെന്നാണ് വിവരം.
റിമാന്ഡ് കാലാവധി പൂര്ത്തിയാക്കി ജാമ്യത്തിലിറങ്ങിയവരാണ് കൊലപാതകത്തിന് പിന്നിലെന്നാണ് പോലീസും സംശയിക്കുന്നത്. ഇവരിറങ്ങിയ അന്ന് രാത്രി 10.30 ഓടെയാണ് ബോംബേറും ആക്രമണവും നടന്നത്. എന്നാല്, പോലീസ് ഇത് ഗുരുതരമായി എടുക്കുകയോ നടപടി സ്വീകരിക്കുകയോ ചെയ്തിരുന്നില്ലെന്നുള്ള ആരോപണം കോണ്ഗ്രസ് നേതാക്കള് ഉന്നയിച്ചിരുന്നു. പോലീസിനെതിരേ ശക്തമായി പ്രതിഷേധം ഉയരുന്ന സാഹചര്യത്തില് റിമാന്ഡ് കാലാവധി പൂര്ത്തിയാക്കി പുറത്തിറങ്ങിയ പ്രതികളുടെ ജാമ്യം റദ്ദാക്കാനുള്ള നടപടി പോലീസ് സ്വീകരിച്ചിട്ടുണ്ട്. ഇതിന്റെ രേഖകള് കോടതിയില് സമര്പ്പിക്കാന് ഉയര്ന്ന പോലീസ് ഉദ്യോഗസ്ഥര് നിര്ദേശം നല്കിയിട്ടുണ്ടെന്നാണ് റിപ്പോര്ട്ട്.
കേസുമായി ബന്ധപ്പെട്ട് ചാലോടുള്ള സിഐടിയു പ്രവര്ത്തകനും സിപിഎം നേതാവുമായ ഒരാളെ പോലീസ് കസ്റ്റഡിയില് എടുത്തിരുന്നു. എന്നാല്, നിര്ണായകമായ ഒരു വിവരവും അയാളില് നിന്നും ലഭിച്ചിട്ടില്ലെന്നാണ് റിപ്പോര്ട്ട്. റിമാന്ഡ് കാലാവധി പൂര്ത്തിയാക്കി പുറത്തിറങ്ങിയ രണ്ടുപേരും ഇപ്പോള് ഒളിവിലാണെന്നും സൂചനയുണ്ട്. ഈ സാഹചര്യത്തില് കൂടിയാണ് അന്വേഷണം ഇവരിലേക്ക് നീളുന്നത്.
Discussion about this post