ബോളിവുഡ് താരം ശ്രീദേവിയുടെ മരണം ആസൂത്രിത കൊലപാതകമാണെന്ന് ആരോപിച്ച് റിട്ടയേഡ് പൊലീസ് ഉദ്യോഗസ്ഥന്‍ രംഗത്ത്. പ്രൈവറ്റ് ഇന്‍വെസ്റ്റിഗേഷന്‍ ഏജന്‍സി നടത്തുന്ന വേദ് ഭൂഷനാണ് ശ്രീദേവിയുടെ മരണത്തില്‍ ദുരൂഹതയുണ്ടെന്ന് ആരോപിച്ച് രംഗത്തെത്തിയിരിക്കുന്നത്. ശ്രീദേവിയുടെ മരണം മുങ്ങിമരണമെന്ന് കണക്കാക്കാന്‍ സാധിക്കില്ലെന്നും അസൂത്രിത കൊലപാതകം പോലെയാണ് തോന്നുന്നതെന്നുമാണ് അദ്ദേഹത്തിന്റെ വാക്കുകള്‍.ഡല്‍ഹി പോലിസില്‍ എസ്പി ആയിരുന്നു വേദ് ഭൂഷണ്‍.
‘ഒരു വ്യക്തിയെ ബാത്ത്ടബ്ബില്‍ തള്ളിയിട്ട് കൊല്ലാന്‍ വളരെ എളുപ്പമാണ്. ശ്വാസം നിലയ്ക്കുന്നതുവരെ അവരെ വെള്ളത്തില്‍ മുക്കിപ്പിടിക്കുന്നതിലൂടെ ഒരു തെളിവും അവശേഷിപ്പിക്കാതെ കൊലനടത്തുകയും അപകട മരണമെന്ന് പറയുകയും ചെയ്യാം. ശ്രീദേവിയുടേത് ആസുത്രിത കൊലപാതകം പോലെയാണ് മനസ്സിലാക്കിയതെന്നും വേദ് ഭൂഷണ്‍ പറയുന്നു.ശ്രീദേവിയുടെ മരണം സ്വന്തം നിലയ്ക്ക് അന്വേഷിക്കാനായി ദുബായില്‍ പോയി തിരിച്ചുവന്നതിന് ശേഷമായിരുന്നു അദ്ദേഹത്തിന്റെ വെളിപ്പെടുത്തല്‍.
ശ്രീദേവിയുടെ മരണവുമായി ബന്ധപ്പെട്ട് ദുബായ് പോലിസ് നടത്തിയ ഫോറന്‍സിക് പരിശോധനയിലും റിപ്പോര്‍ട്ടിലും വിശ്വാസമില്ലെന്നാണ് ഇദ്ദേഹത്തിന്റെ അഭിപ്രായം.ശ്രീദേവിയുടെ മരണ റിപ്പോര്‍ട്ടില്‍ സംതൃപ്തരല്ലെന്നും യഥാര്‍ത്ഥത്തില്‍ എന്താണ് നടന്നതെന്ന് അറിയണമെന്നും അദ്ദേഹം പറഞ്ഞു. ഉത്തരം കിട്ടാത്ത നിരവധി ചോദ്യങ്ങളുണ്ടെന്നും മരണം സംബന്ധിച്ച വസ്തുതകള്‍ക്കായി തങ്ങള്‍ ദുബായില്‍ പോയെന്നും ഭൂഷന്‍ കുട്ടിച്ചേര്‍ത്തു. അന്വേണത്തിന്റെ ഭാഗമായി ഭൂഷണ്‍ ശ്രീദേവി മരിച്ച ജുമൈറ എമിറേറ്റ്സ് ടവറില്‍ പോയിരുന്നു. എന്നാല്‍ ശ്രീദേവി താമസിച്ച മുറിയില്‍ പ്രവേശിക്കാനായില്ല. തുടര്‍ന്ന് മറ്റൊരു മുറിയില്‍ അതേ രംഗങ്ങള്‍ പുനര്‍സൃഷ്ടിച്ചാണ് മരണത്തില്‍ എന്തോ നിഗൂഢതയുണ്ടെന്ന അനുമാനത്തിലെത്തിയത്.
എന്തുകൊണ്ടാണ് ശ്രീദേവിയുടെ മരണം പെട്ടെന്ന് അവസാനിപ്പിക്കാന്‍ കാരണമെന്നും അദ്ദേഹം ചോദിച്ചു. മണിക്കൂറുകള്‍ക്ക് മുന്‍പ് വരെ അന്വേഷണം പുരോഗമിക്കുകയാണെന്ന് പറഞ്ഞിട്ട് പെട്ടെന്ന് കേസ് അവസാനിപ്പിക്കുകയായിരുന്നു. ശ്രീദേവിയുടെ മരണം കൊലപാതകമാണെന്നുള്ള വിശ്വാസത്തിലാണ് ഭൂഷന്‍. അദ്ദേഹത്തിന്റെ കീഴിലുള്ള സ്വതന്ത്ര്യ അന്വേഷണം തുടരുകയാണ്. ഉന്നത തലത്തില്‍ കേസ് അന്വേഷിക്കണമെന്നാണ് അദ്ദേഹത്തിന്റെ ആവശ്യം.
Discussion about this post