ജലന്ധര്‍ ബിഷപ്പിനെതിരെ ബലാത്സംഗ പരാതി നല്‍കിയ കന്യാസ്ത്രീയെ വധിക്കാന്‍ ശ്രമമുണ്ടായെന്ന് പരാതി. കന്യാസ്ത്രീ കുറവിലങ്ങാട് പോലീസ് സ്‌റ്റേഷനിലാണ് പരാതി നല്‍കിയത്. താന്‍ സഞ്ചരിച്ചുകൊണ്ടിരുന്ന കാറിന്റെ ബ്രേക്ക് ഊരിമാറ്റാന്‍ ശ്രമമുണ്ടായെന്നാണ് പരാതിയില്‍ പറയുന്നത്.
കന്യാസ്ത്രീയുടെ മഠത്തില്‍ ഒരു അന്യസംസ്ഥാന തൊഴിലാളി ജോലിയെടുക്കുന്നുണ്ടെന്നും ഇയാളോട് ബിഷപ്പിന്റെ സഹായിയായ ലോറന്‍സിന്റെ സഹോദരന്‍ കന്യാസ്ത്രീയുടെ യാത്രകളുടെ വിവരങ്ങള്‍ ചോദിച്ചുവെന്നും പരാതിയില്‍ പറയുന്നു. സഞ്ചരിക്കുന്ന കാറിന്റെ ബ്രേക്ക് ഊരിമാറ്റാന്‍ പറ്റുമോയെന്ന് അന്വേഷിച്ചുവെന്നും കന്യാസ്ത്രീ പറഞ്ഞു. സഹോദരന്‍ ഫോണില്‍ വിളിച്ചാണ് ഇക്കാര്യം തിരക്കിയതെന്നും പരാതിയില്‍ വ്യക്തമാക്കുന്നുണ്ട്. പരാതിയെത്തുടര്‍ന്ന് പോലീസ് അന്വേഷണം ആരംഭിച്ചിട്ടുണ്ട്.
നിലവില്‍ ബലാത്സംഗ പരാതിക്ക് പുറമെ കേസ് പിന്‍വലിക്കാന്‍ വേണ്ടി കൈക്കൂലി നല്‍കാമെന്ന് ബിഷപ്പ് പറഞ്ഞുവെന്നൊരു പരാതിയും കന്യാസ്ത്രീയും കന്യാസ്ത്രീയുടെ സഹോദരനും നല്‍കിയിട്ടുണ്ട്. അതേസമയം ജലന്ധര്‍ ബിഷപ്പിനെ അറസ്റ്റ് ചെയ്യണമെന്ന സമ്മര്‍ദം കൂടിവരുമ്പോഴും പോലീസ് ഇതുവരെ അദ്ദേഹത്തെ അറസ്റ്റ് ചെയ്തിട്ടില്ല.
Discussion about this post