ഖത്തറിലേക്ക് കഞ്ചാവ് കടത്തുന്ന സംഘത്തിലെ കാസര്‍കോട് സ്വദേശികളായ മൂന്നുപേര്‍ അറസ്റ്റില്‍. കരിപ്പൂര്‍ വിമാനത്താവളത്തിലേക്കുള്ള യാത്രയ്ക്കിടെ വടകരയില്‍ വെച്ചാണ് ഇവരെ അറസ്റ്റു ചെയ്തത്. പിടികൂടുന്ന സമയത്ത് ഇവരുടെ കയ്യില്‍ നിന്ന് രണ്ടുകിലോ കഞ്ചാവും പിടികൂടി. കാസര്‍കോട് മടിക്കൈയിലെ അരൈവട്ടത്തോട് ബി. മുനീര്‍ (33), പെരിയ ബദര്‍ പള്ളിക്ക് സമീപം വാടക ക്വാര്‍ട്ടേഴ്‌സില്‍ താമസിക്കുന്ന ഇരിക്കൂര്‍ പഴയംകോടിലെ മുബാറക് മന്‍സിലില്‍ മിനിക്കല്‍ മുസ്തഫ (57), കാഞ്ഞങ്ങാട് ഒഴിഞ്ഞവളപ്പിലെ സക്കീന മന്‍സിലില്‍ കെ. സിദ്ദിഖ് (26) എന്നിവരാണ് അറസ്റ്റിലായത്
പോലിസിന് കിട്ടിയ രഹസ്യവിവരത്തെ തുടര്‍ന്ന് ബുധനാഴ്ച വൈകീട്ട് നാലുമണിക്ക് ദേശീയപാതയിലെ പുതുപ്പണം പാലയാട് നടയില്‍ വാഹനപരിശോധന നടത്തി. വടകര സി.ഐ. മധുസൂദനന്‍ നായരുടെ നേതൃത്വത്തിലുള്ള പോലീസ് സംഘം ആണ് ഇവരെ പിടികൂടിയത്. പ്രതികളുടെ കാറും കസ്റ്റഡിയിലെടുത്തു. ഖത്തറിലേക്ക് കടത്താന്‍ പാകത്തില്‍ പൊതിഞ്ഞ് പെട്ടിയിലെ വസ്ത്രങ്ങള്‍ക്കുള്ളില്‍ ഒളിപ്പിച്ച നിലയിലായിരുന്നു കഞ്ചാവ്. കാസര്‍കോട് കേന്ദ്രീകരിച്ച് ഖത്തറിലേക്ക് കഞ്ചാവ് ഉള്‍പ്പെടെയുള്ള മയക്കുമരുന്നുകള്‍ കടത്തുന്ന സംഘത്തില്‍ പെട്ടവരാണ് ഇവരെന്ന് പോലീസ് പറഞ്ഞു.
മുസ്തഫയാണ് സംഘത്തിലേക്ക് ചെറുപ്പക്കാരെ റിക്രൂട്ട് ചെയ്യുന്നത്. ഇവരെ നിയന്ത്രിക്കുന്നത് ഒരു മലപ്പുറം സ്വദേശിയാണ്. ഇപ്പോള്‍ ഖത്തറിലുള്ള ഇയാളെക്കുറിച്ചും പോലീസിന് വിവരം ലഭിച്ചിട്ടുണ്ട്. മുസ്തഫ ഈ വര്‍ഷം മൂന്നു പ്രാവശ്യം ഖത്തറിലേക്ക് പോയതിന്റെ തെളിവ് പോലീസിന് ലഭിച്ചു. . രണ്ടുകിലോ കഞ്ചാവ് കടത്തിയാല്‍ രണ്ടരലക്ഷം രൂപയാണ് സംഘത്തിന് ലഭിക്കുന്നത്. ഇതില്‍ ഒരുലക്ഷം രൂപ കഞ്ചാവ് കടത്തുന്നയാള്‍ക്ക് നല്‍കും. ബാക്കി ഒന്നരലക്ഷം രൂപ ഏജന്റിനുള്ളതാണ്.
കാസര്‍കോട്ടുനിന്ന് കഞ്ചാവും ഹാഷിഷും കടത്തിയ സംഘത്തിലെ രണ്ടുപേര്‍ കഴിഞ്ഞ ദിവസങ്ങളില്‍ ഖത്തര്‍ പോലീസിന്റെ പിടിയിലായതായി പോലീസിന് വിവരം ലഭിച്ചിട്ടുണ്ട്.
വിമാനത്താവളത്തിലെ പരിശോധനയില്‍ പിടിക്കപ്പെടാതിരിക്കാന്‍ തന്ത്രപരമായിട്ടാണ് സംഘം കഞ്ചാവ് പൊതിഞ്ഞിരുന്നത്. ആദ്യം സാധാരണപൊതി, അതിനു മുകളില്‍ കാര്‍ബണ്‍ പേപ്പര്‍ കൊണ്ടുള്ള പൊതി, പിന്നീട് സില്‍വര്‍ പേപ്പര്‍. നന്നായി വരിഞ്ഞുമുറുക്കിയ ശേഷം പ്ലാസ്റ്റിക് സഞ്ചിയിലാക്കി വീണ്ടുമൊരു പൊതി. ഇതിനു ശേഷം എല്ലാഭാഗവും സെല്ലോ ടാപ്പ് കൊണ്ട് മനോഹരമായി പൊതിയും. മണം പുറത്തുവരുന്നത് തടയാനാണിത്. ശേഷം ബാഗിലെ വസ്ത്രങ്ങള്‍ക്കിടയിലാണ് വെച്ചിരുന്നത്. അതും പാന്റിനുള്ളിലേക്ക് കയറ്റിവെച്ച നിലയില്‍. വിദേശത്തേക്ക് കൊണ്ടുപോകാന്‍ തയ്യാറാക്കി വെച്ചിരുന്ന പെട്ടിയിലാണ് കഞ്ചാവ് ഉണ്ടായിരുന്നത്.കാസര്‍കോട്ടുനിന്ന് കഞ്ചാവും ഹാഷിഷും കടത്തിയ സംഘത്തിലെ രണ്ടുപേര്‍ കഴിഞ്ഞ ദിവസങ്ങളില്‍ ഖത്തര്‍ പോലീസിന്റെ പിടിയിലായതായി പോലീസിന് വിവരം ലഭിച്ചിട്ടുണ്ട്.
Discussion about this post