” വൈദികരുടെയും പിതാക്കന്മാരുടെയും കലാവിരുത് ഇന്നോ ഇന്നലെയോ തുടങ്ങിയതല്ല, നാളെയോ മറ്റന്നാളോ തീരുന്നതുമല്ല ” കെ.സി.ബി.സിയെ പരിഹസിച്ച് അഡ്വക്കേറ്റ് എ ജയശങ്കര്‍

ലൈംഗീകപീഡനത്തിനിരയായ കന്യസ്ത്രീയ്ക്ക് പിന്തുണയേകിയുള്ള സമരത്തിന് എതിരെ രംഗത്ത് എത്തിയ കെ.സി.ബി.സിയെ പരിഹസിച്ച് അഡ്വക്കേറ്റ് എ ജയശങ്കര്‍ .

വൈദികരുടെയും പിതാക്കന്മാരുടെയും കലാവിരുത്ത് ഇന്നോ ഇന്നലെയോ തുടങ്ങിയതല്ല , നാളെയോ മറ്റന്നാളോ തീരുന്നതുമല്ല അത് ദൈവാനുഗ്രഹമായി സ്വീകരിക്കാതെ ദുര്‍വ്യഖ്യാനം ചെയ്യുന്നത് വലിയ പള്ളികുറ്റമാണെന്നാണ് ജയശങ്കറിന്റെ പരിഹാസം .

ബെനഡിക്ട് ഓണംകുളത്തിന്‍റെയും റോബിന്‍ വടക്കുംചേരിയുടെയും വീരപാരമ്പര്യമാണ് സിറോ മലബാര്‍ സഭയ്ക്കുള്ളത് .ഹൈക്കോടതി ജംഗ്ഷനില്‍ ഒന്ന് രണ്ടു കന്യാസ്ത്രീകള്‍ ഇരുന്നാലോ കെമാല്‍ പാഷയും പിടി തോമസും ഐക്യദാര്‍ഢ്യം പ്രഖ്യാപിച്ചാലോ തിരുസഭ കുലുങ്ങില്ലെന്നും തന്റെ ഫേസ്ബുക്ക് പോസ്റ്റില്‍ കുറിച്ചു .

പോസ്റ്റിന്റെ പൂര്‍ണ്ണരൂപം

അല്പം വൈകിയെങ്കിലും കേരള കത്തോലിക്കാ മെത്രാൻ സമിതി (KCBC) നിലപാട് വ്യക്തമാക്കി.

കന്യാസ്ത്രീ സമരം അനാവശ്യമാണ്, സഭാ വിരുദ്ധമാണ്, കടുത്ത അച്ചടക്ക ലംഘനവുമാണ്. സമരത്തിൽ പങ്കെടുക്കുന്നവരും അനുഭാവം പ്രകടിപ്പിക്കുന്നവരും ഫലത്തിൽ ദൈവദൂഷണമാണ് ചെയ്യുന്നത്.

വൈദികരുടെയും പിതാക്കന്മാരുടെയും കലാവിരുത് ഇന്നോ ഇന്നലെയോ തുടങ്ങിയതല്ല, നാളെയോ മറ്റന്നാളോ തീരുന്നതുമല്ല. അത് ദൈവാനുഗ്രഹമായി സ്വീകരിക്കാതെ പീഡനമായി ദുർവ്യാഖ്യാനം ചെയ്യുന്നത് വലിയ പളളിക്കുറ്റമാണ്.