ശബരിമല യുവതി പ്രവേശന വിഷയത്തില്‍ സംസ്ഥാന സര്‍ക്കാര്‍ എടുത്തിരിക്കുന്ന നിലപാടിനെതിരെ എന്‍.എസ്.എസ് സംഘടിപ്പിച്ച ശരണമന്ത്ര നാമജപ ഘോഷയാത്രയില്‍ പങ്കെടുത്ത 1,500ഓളം പ്രവര്‍ത്തകര്‍ക്കെതിരെ പോലീസ് കേസെടുത്തു. കേസില്‍ സ്ത്രീകളും പ്രതികളാണ്.
തിരുവനന്തപുരത്തെ ആറ്റിങ്ങലിലെ ചിറയിന്‍കീഴ് താലൂക്ക് എന്‍.എസ്.എസ് യൂണിയന്റെ നേതൃത്വത്തില്‍ നടന്ന ശരണമന്ത്ര നാമജപ ഘോഷയാത്രയില്‍ പങ്കെടുത്ത പ്രവര്‍ത്തകര്‍ക്കെതിരെ കേസെടുത്തിട്ടുണ്ട്. കണ്ടാലറിയാവുന്ന ആയിരം പേര്‍ക്കെതിരെയാണ് കേസ്. ദേശീയപാതയിലുള്‍പ്പെടെ ഗതാഗതം തടസ്സപ്പെടുത്തി എന്ന കാരണം ചൂണ്ടിക്കാട്ടിയാണ് പോലീസ് കേസെടുത്തിട്ടുള്ളത്. കേസില്‍ ഉടന്‍ അറസ്റ്റ് ഉണ്ടാകുമെന്ന സി.ഐ സുനില്‍ പറഞ്ഞു.
ഒക്ടോബര്‍ 20നായിരുന്നു ആറ്റിങ്ങലില്‍ നാമജപ യാത്ര നടന്നത്. യൂണിയന്‍ പ്രസിഡന്റ് ജി.മധുസൂദനന്‍പിള്ളയുടെ നേതൃത്വത്തിലായിരുന്നു യാത്ര നടന്നത്. യൂണിയന്‍ ഓഫിസിനു മുന്നില്‍നിന്നും വീരളം ശ്രീകൃഷ്ണസ്വാമി ക്ഷേത്രത്തിലേക്കായിരുന്നു യാത്ര. ജി.മധുസൂദനന്‍പിള്ളയ്‌ക്കെതിരെയും കേസുണ്ട്. സമാധാനപരമായിട്ടും പ്രകോപനങ്ങള്‍ സൃഷ്ടിക്കാതെയും നാശനഷ്ടങ്ങളുണ്ടാക്കാതെയും ഈശ്വര പ്രാര്‍ഥനയോടെയാണു സ്ത്രീകളടക്കമുള്ളവര്‍ യാത്ര നടത്തിയതെന്ന് മധുസൂദനന്‍പിള്ള വ്യക്തമാക്കി.
അതേസമയം നെടുമങ്ങാട് എന്‍.എസ്.എസ് യൂണിറ്റിന്റെ കീഴില്‍ നടന്ന നാമജപയാത്രയില്‍ പങ്കെടുത്ത 500പേര്‍ക്കെതിരെയും കേസെടുത്തിട്ടുണ്ട്. ഒക്ടോബര്‍ 16നായിരുന്നു നാമജപയാത്ര നടന്നത്. താലൂക്ക് എന്‍എസ്എസ് യൂണിയന്‍ പ്രസിഡന്റ് വി.എ.ബാബുരാജിന്റെ നേതൃത്വത്തിലായിരുന്നു നാമജപയാത്ര നടന്നത്.
അതേസമയം ശബരിമല വിഷയത്തില്‍ 2,825 പേരെ ഇതിനോടകം പോലീസ് അറസ്റ്റ് ചെയ്തിട്ടുണ്ട്. എന്നാല്‍ നാമജപയാത്രയില്‍ പങ്കെടുത്ത സ്ത്രീകള്‍ക്കെതിരെ നടപടിയെടുക്കണ്ടായെന്ന് ഡി.ജി.പി ലോക്‌നാഥ് ബെഹ്‌റ വ്യക്തമാക്കി.
Discussion about this post