ന്യൂനപക്ഷവികസന ധനകാര്യ കോര്പ്പറേഷനില് ബന്ധുനിയമനം നടത്തിയെന്ന ആരോപണം നേരിടുന്ന മന്ത്രി കെ.ടി.ജലീലിന്റെ ബന്ധു കെ.ടി.അദീപ് രാജിക്കത്ത് നല്കി. ന്യൂനപക്ഷവികസന ധനകാര്യ കോര്പ്പറേഷന്റെ ജനറല്മാനേജര്സ്ഥാനം ഒഴിയാനാഗ്രഹിക്കുന്നുവെന്ന് ചൂണ്ടിക്കാട്ടി കോര്പ്പറേഷന്റെ എം.ഡിക്ക് ഇ-മെയില് വഴിയാണ് രാജിക്കത്ത് നല്കിയിട്ടുള്ളത്.
തന്നെ മാതൃസ്ഥാപനമായ സൗത്ത് ഇന്ത്യന് ബാങ്കിലേക്ക് തിരിച്ചുപോകാന് അനുവദിക്കണമെന്ന് കെ.ടി.അദീപ് രാജിക്കത്തില് ആവശ്യപ്പെട്ടിട്ടുണ്ട്. സമൂഹത്തില് പിന്നാക്കം നില്ക്കുന്നവരുടെ ഉന്നമനത്തിനായി പ്രവര്ത്തിക്കുക എന്ന ഉദ്ദേശ്യം മാത്രമാണ് തനിക്കുള്ളതെന്നും കെ.ടി.അദീപ് വ്യക്തമാക്കി. വിവാദങ്ങളില് താന് വലിച്ചിഴക്കപ്പെട്ടതാണെന്നും ഇതില് തനിക്ക് ഖേദമുണ്ടെന്നും അദീപ് പറഞ്ഞു.
അദീപിന്റെ രാജിക്കത്ത് സ്വീകരിക്കാനാണ് സാധ്യതയെന്ന് ന്യൂനപക്ഷവികസന ധനകാര്യ കോര്പ്പറേഷന് ചെയര്മാന് എ.പി.അബ്ദുള് വഹാബ് വ്യക്തമാക്കി. ഇന്ന് രാജിക്കത്തിനെപ്പറ്റി ചര്ച്ച ചെയ്യാന് ഡയറക്ടര് ബോര്ഡ് യോഗം ചേരുന്നുണ്ട്.
കോര്പ്പറേഷന്റെ ജനറല് മാനേജര് സ്ഥാനത്തേക്ക് അപേക്ഷ അയച്ചെങ്കിലും അഭിമുഖത്തിന് പങ്കെടുക്കാത്തയാളെ ജനറല് മാനേജരായി നിയമിച്ചതാണ് വിവാദത്തിനിടയാക്കിയത്. ഡെപ്യൂട്ടേഷന് തസ്തികയിലേക്കുള്ള നിയമനത്തില് സൗത്ത് ഇന്ത്യന് ബാങ്ക് ജീവനക്കാരനെ പരിഗണിച്ചതും തെറ്റാണെന്ന് ആരോപണമുയര്ന്നിരുന്നു.
Discussion about this post