കോഴിക്കോട്: ശബരിമല കര്‍മസമിതി നടത്തുന്ന ഹര്‍ത്താലിനിടെ തുറന്ന കോഴിക്കോട് മിഠായിത്തെരുവിലെ കടകള്‍ അടപ്പിച്ചു. വ്യാപാരികള്‍ കടകള്‍ തുറന്നതിനെത്തുടര്‍ന്ന് ഹര്‍ത്താല്‍ അനുകൂലികളെത്തി അടപ്പിക്കുകയായിരുന്നു.
കടകള്‍ തുറക്കാന്‍ പൊലീസ് സംരക്ഷണം നല്‍കണമെന്ന് വ്യാപാരികള്‍ ആവശ്യപ്പെട്ടു. ഒരു വശത്തുകൂടി ശബരിമല കര്‍മസമിതിയുടെ പ്രതിഷേധവും മറുവശത്തുകൂടി ഡിവൈഎഫ്‌ഐക്കാരും പ്രതിഷേധം നടത്തിയതിനെത്തുടര്‍ന്ന് പൊലീസ് രണ്ടു തവണ കണ്ണീര്‍ വാതകം പ്രയോഗിച്ചു. മേഖലയിലെ സ്ഥിതി സാധാരണനിലയില്‍ ആയിട്ടില്ല. ഇപ്പോള്‍ കടകള്‍ അടഞ്ഞുകിടക്കുകയാണ്.
തൃശൂര്‍ നഗരത്തില്‍ കട തുറക്കാനുള്ള വ്യാപാരികളുടെ ശ്രമം ഹര്‍ത്താലനുകൂലികള്‍ തടഞ്ഞിരുന്നു. എറണാകുളം ഉള്‍പ്പടെ എല്ലാ ജില്ലകളിലും കടകള്‍ അടഞ്ഞുകിടക്കുകയാണ്.
വടക്കാഞ്ചേരിയില്‍ ബിജെപി പ്രകടനത്തിനു നേരെ സിപിഎം ഓഫിസിനു പുറകില്‍നിന്നു ഡിവൈഎഫ്‌ഐ പ്രവര്‍ത്തകര്‍ കല്ലേറ് നടത്തി. സംഘര്‍ഷത്തില്‍ പൊലീസ് ഇടപെട്ടില്ല. കുറച്ചു സമയത്തിനു ശേഷം തിരിച്ചും കല്ലേറ് നടത്തി.
Discussion about this post