‘ ദി ഗ്രേറ്റ് അമേത്തി എസ്‌കേപ്പ് ആക്റ്റ്’. രാഹുല്‍ സുരക്ഷിതമണ്ഡലം തേടുന്നതിന് പിന്നില്‍- കണക്കും കാര്യങ്ങളും

വിശ്വരാജ്

കണക്കുകള്‍ ആണ് രാഹുല്‍ ഗാന്ധിയെ അമേത്തി വിട്ടു സുരക്ഷിത മണ്ഡലം തേടാന്‍ പ്രേരിപ്പിക്കുന്നത്. ചില നിസ്സാര കണക്കുകള്‍..

രാഹുല്‍ ഗാന്ധിക്ക് ഈ കണക്കില്‍ വലിയ പിടിപ്പ് ഇല്ലെങ്കിലും ശമ്പളം കൊടുത്തു അത് ചെയ്യാന്‍ വച്ചിരിക്കുന്നവര്‍ക്ക് അത് ചെയ്‌തെല്ലേ പറ്റൂ… അപ്പോള്‍ സുരക്ഷിത മണ്ഡലം എന്ന നിലക്ക് മറ്റെവിടെ എങ്കിലും കൂടി രാഹുല്‍ ഗാന്ധി മത്സരിക്കുന്നതിന്റെ കാരണവും അത് തന്നെ … കണക്കുകളോടുള്ള പേടി ഒരുപക്ഷെ കാടും ആനയും പുലിയും ഒക്കെ ഉള്ള നമ്മുടെ വയനാടും ആവാം രാഹുലിന്റെ ആ സുരക്ഷിത താവളം…

#അമേത്തി ലോകസഭാ മണ്ഡലം നിലവില്‍ വന്നത് 1967 ആണ്. അതിനു ശേഷം 15 ലോകസഭാ തെരഞ്ഞെടുപ്പുകള്‍ വന്നു. .അതില്‍ 13 തവണയും അമേത്തി കോണ്‍ഗ്രസിന്റെ ഒപ്പം നിന്നു. രണ്ടേ രണ്ടു തവണ അമേത്തി കോണ്‍ഗ്രസിനെ കൈവിട്ടതിനു വ്യക്തമായ കാരണങ്ങളും ഉണ്ട്.

ഒന്ന് ഇന്ദിര ഗാന്ധിയുടെ ജനാധിപത്യ ധ്വംസനം അടിയന്തിരാവസ്ഥക്ക് ശേഷം ഉള്ള 1977 ലെ തെരഞ്ഞെടുപ്പും പിന്നെ രാജീവ് ഗാന്ധജിയുടെ മരണശേഷം നെഹ്‌റു കുടുംബം അമേത്തിയെ ദീര്‍ഘനാളായി കൈവിട്ട ശേഷം ഉള്ള 1998 ലും. നെഹ്‌റു കുടുംബത്തിലെ നാല് തലമുറ അമേത്തിയില്‍ നിന്നും ഇന്ത്യന്‍ പാര്‍ലമെന്റില്‍ എത്തിയിട്ടുണ്ട് എങ്കിലും അമേത്തി ഇന്നും മാറ്റമില്ലാതെ പട്ടിണിയും ദാരിദ്ര്യവും ആയി ഇന്നും വോട്ട് ചെയ്യാനായി എത്തുന്നു.

പക്ഷെ കാര്യങ്ങള്‍ മാറി മറിഞ്ഞത് 2014 ഓടെ ആണ്. അതിനു മുന്നേ 2009 ലെ പാര്‍ലമെന്റ് തെരഞ്ഞടുപ്പില്‍ ബിജെപി അമേത്തിയില്‍ നേടിയത് 37000 വോട്ടാണ് എന്നറിയണം ..
എന്നാല്‍ തോല്‍വി ഉറപ്പിച്ചു കൊണ്ട് തന്നെ കോണ്‍ഗ്രസ് ഹോം ഗ്രൗണ്ടായ അമേത്തിയിലേക്ക് ബിജെപി നിയോഗിച്ചത് ബിജെപിയുടെ ഗര്‍ജ്ജിക്കുന്ന പെണ്‍പുലി ആയ സ്മൃതി ഇറാനിയെ ആണ്.. അന്ന് മോഡി ആവശ്യപ്പെട്ടത് നിരാകരിച്ചു കൊണ്ട് സ്മൃതിക്ക് വേണമെങ്കില്‍ ഏതെങ്കിലും സുരക്ഷിത മണ്ഡലം തെരെഞ്ഞെടുത്തു മത്സരിക്കാമായിരുന്നു..

എന്നാല്‍ വെല്ലുവിളി ഏറ്റെടുത്തു കൊണ്ട് രാഹുല്‍ ഗാന്ധി എന്ന കോണ്‍ഗ്രസ് പ്രസിഡന്റിന് എതിരെ കടുത്ത മത്സരം കാഴ്ച വച്ച് കൊണ്ട് 3 ലക്ഷത്തില്‍ അധികം വോട്ടുകള്‍ നേടി സ്മൃതി ഇറാനി യുവരാജാവിനെ ഞെട്ടിച്ചു. കഥ അവിടെ കഴിഞ്ഞില്ല , തെരെഞ്ഞെടുപ്പ് കഴിയുന്നതോടെ സാധാരണ പോലെ നെഹ്‌റു കുടുംബം പതിവ് പോലെ അമേത്തിയില്‍ നിന്ന് പൊടിയും തട്ടി സ്ഥലം വിട്ടു. ജയിച്ച സ്ഥാനാര്‍ഥി പോലും മണ്ഡലത്തില്‍ എത്താറില്ല . എങ്കിലും സ്മൃതി ഇറാനി കഴിഞ്ഞ 5 വര്ഷം കൃത്യമായി അമേത്തിയില്‍ ഉടനീളം യാത്ര ചെയ്തു കൊണ്ടേ ഇരുന്നു.

ജനങ്ങളുടെ പ്രശ്ങ്ങള്‍ മനസ്സിലാക്കി അവരുടെ ദീദി ആയി, മണ്ഡലത്തില്‍ തന്നെ സമയം ചിലവഴിച്ചു. വികസനം തൊട്ടു തീണ്ടാത്ത അമേത്തിയില്‍ സ്മൃതി ഇറാനി മോദിയുടെ കൈപിടിച്ച് വികസന പദ്ധതികള്‍ ഒന്നൊന്നായി കൊണ്ട് വന്നു. എന്റെ പെങ്ങള്‍ ആണ് നിങ്ങളുടെ അടുത്തേക്ക് ഓരോ തവണയും എന്നെ കൊണ്ട് വരുന്നത് എന്ന് മോഡി ആവര്‍ത്തിച്ചു അമേത്തിയിലെ ജനങ്ങളോട് പറഞ്ഞു. അമേത്തി സദ്ഭരണം എന്തെന്ന് അറിഞ്ഞു, വികസനം എന്തെന്ന് അറിഞ്ഞു. നെഹ്‌റു കുടുംബത്തില്‍ നിന്നല്ല സ്മൃതി ഇറാനി എന്ന ബിജെപി മന്ത്രിയില്‍ നിന്ന്, അമേത്തിയുടെ ദീദിയില്‍ നിന്ന് ..

2017 ലെ UP തെരെഞ്ഞെടുപ്പ് : 2016 ലെ നോട്ട് നിരോധനം കഴിഞ്ഞു വന്ന പ്രധാനപ്പെട്ട തെരെഞ്ഞെടുപ്പ് ആണല്ലോ ഉത്തര്‍പ്രദേശ് തെരെഞ്ഞെടുപ്പ് . മോദിയുടെ തോല്‍വി ഉറപ്പ് എന്ന് ഏവരും പ്രവചിച്ച നിലയില്‍ നിന്ന് റെക്കോര്‍ഡ് തകര്‍ത്തു ബിജെപിക്ക് വോട്ട് നല്‍കി ജനങ്ങള്‍ യോഗി ആദിത്യനാഥിനെ മുഖ്യമന്ത്രിയാക്കിയ തെരെഞ്ഞെടുപ്പ്. ആ തെരഞ്ഞെടുപ്പിലെ കണക്കാണ് രാഹുലിനെ ഇന്ന് മാറി ചിന്തിപ്പിക്കാന്‍ പ്രേരിപ്പിച്ചത്..

#അമേത്തി പാര്‍ലമെന്റ് മണ്ഡലം എന്നത് 5 നിയമസഭാ മണ്ഡലങ്ങള്‍ കൂടിയത് ആണ്, തിലോയ് , സലോ, ജഗദിഷ്പൂര്‍, ഗൗരിഗഞ്ജ് , അമേത്തി.

 2017 ലെ ഉത്തര്‍പ്രേദേശ് നിയമസഭാ തെരെഞ്ഞെടുപ്പില്‍

> തിലോ മണ്ഡലത്തില്‍ നിന്നും ബിജെപിയുടെ മായങ്കേശ്വര്‍ സിംഗിനെ ജനം വോട്ട് ചെയ്തു വിജയിപ്പിച്ചപ്പോള്‍ കോണ്‍ഗ്രസ് രണ്ടാം സ്ഥാനത്തു പോലും എത്തിയില്ല..

> സലോ മണ്ഡലത്തില്‍ ആവട്ടെ ബിജെപിയുടെ ദാല്‍ ബഹദൂറിനെ ആണ് ജനം കോണ്‍ഗ്രസിനെ പരാജയപ്പെടുത്തി വിജയിപ്പിച്ചത്.

> ജഗദീശപൂരില്‍ ബിജെപിയുടെ സുരേഷ് കുമാര്‍ കോണ്‍ഗ്രസ് സ്ഥാനാര്‍ത്ഥിയെ പരാജയപ്പെടുത്തി.

> ഗൗരിഗഞ്ചില്‍ സമാജ്‌വാദി പാര്‍ട്ടി നേതാവ് രാകേഷ് പ്രതാപ് സിംഗ് വിജയിച്ചു. അവിടെയും കോണ്‍ഗ്രസിനെ ജനം തഴഞ്ഞു.

>ഇനി അമേത്തി നിയമസഭാ സീറ്റില്‍ ബിജെപിയുടെ ഗരിമ സിംഗിനെ അമേത്തിയിലെ ജനങ്ങള്‍ വോട്ട് ചെയ്തു വിജയിപ്പിച്ചപ്പോള്‍ അവിടെയും കോണ്‍ഗ്രസ് മൂന്നാം സ്ഥാനത്തു ആണ്.

ചുരുക്കി പറഞ്ഞാല്‍ അമേത്തി എന്ന പാര്‍ലമെന്റ് മണ്ഡലം കഴിഞ്ഞ 5 വര്‍ഷത്തിനുള്ളില്‍ കോണ്‍ഗ്രസിനെ അങ്ങ് പൂര്‍ണ്ണമായും ഉപേക്ഷിച്ചു കളഞ്ഞു. അമേത്തിയിലെ 5 നിയമസഭാ സീറ്റില്‍ ഒന്നില്‍ പോലും കോണ്‍ഗ്രസ് വിജയിച്ചില്ല. 2014 ല്‍ ആദ്യമായി അമേത്തിയില്‍ വന്ന സ്മൃതി രാഹുലിനെ സ്വന്തം തട്ടകത്തില്‍ വിറപ്പിച്ചു വിട്ടു എങ്കില്‍ ഇന്ന് അമേത്തിക്കാര്‍ക്ക് സ്മൃതി അവരുടെ ദീദി ആണ്, സഹോദരി ആണ്, കൂട്ടുകാരി ആണ്..

2014 ല്‍ ആദ്യമായി അമേത്തിയില്‍ വന്ന സ്മൃതി ഇറാനി രാഹുലിനെ ഞെട്ടിച്ചു കൊണ്ട് 37000 ത്തില്‍ നിന്ന് 3 ലക്ഷം വോട്ട് പിടിച്ചു അവിടെ നിന്ന് പോവുകയല്ലായിരുന്നു, അവിടുത്തെ ജനത്തിന്റെ കൂടെ തന്നെ ഉണ്ടെന്ന തെളിവ് ആണ് 2017 ലെ നിയമസഭാ തെരെഞ്ഞെടുപ്പില്‍ കണ്ടത്. .. 2014 ലെ 3 ലക്ഷം വോട്ടല്ല , 2014 മുതല്‍ ഇങ്ങോട്ട് അമേത്തിക്കാര്‍ ചെയ്ത വോട്ടിന്റെ കണക്കാണ് രാഹുലിനെ അമേത്തി വിട്ടു സുരക്ഷിത സ്ഥാനം തേടി പോകാന്‍ പ്രേരിപ്പിക്കുന്നത്..

ഇതില്‍ നിന്നും മനസ്സിലാക്കാന്‍ ഉള്ള ഒരു രസകരമായ വസ്തുത എന്തെന്നാല്‍, 13/ 15 തവണ കോണ്‍ഗ്രസിനെ വിജയിപ്പിച്ച, നെഹ്‌റു കുടുംബത്തിലെ 4 തലമുറയെ വിജയിപ്പിച്ച അമേത്തിയിലെ ജനങ്ങള്‍ എന്താണ് യഥാര്‍ത്ഥ വികസനം, എന്നറിഞ്ഞ പാടെ നിലപാട് മാറ്റാന്‍ തയ്യാറായി എങ്കില്‍ ബിജെപി എന്ന പാര്‍ട്ടിക്ക് എന്തൊക്കെ ചെയ്യാന്‍ കഴിയും എന്ന് സത്യത്തില്‍ ബിജെപി ഇത് വരെ മനസിലാക്കിയിട്ടില്ല എന്ന് പറയേണ്ടി വരും…

ലൂട്ടന്‍സ് മാധ്യമ ലോകം മോദിയെ കടിച്ചു കീറിയത് പോലെ ആക്രമിച്ച മറ്റൊരു നേതാവ് ആണ് സ്മൃതി ഇറാനി. ദി എലൈറ്റ് ഇന്ത്യന്‍ ഫസ്റ്റ് ഫാമിലി ആയി മാധ്യമ തമ്പ്രാന്മാര്‍ വാഴിച്ചു വച്ച നെഹ്‌റു കുടുംബ പാരമ്പര്യത്തെ വെല്ലുവിളിക്കാന്‍ മാത്രം ഒരു പീറ സീരിയല്‍ നടിക്ക് ഇത്ര ധിക്കാരമോ എന്ന മട്ടില്‍ ആണ് അമേത്തിക്ക് ശേഷം മാധ്യമ ലോകം സ്മൃതിയെ വളഞ്ഞിട്ട് ആക്രമിച്ചത്.

അതില്‍ പതറാതെ തളരാതെ അമേത്തിയിലെ ജനങ്ങളുടെ കൂടെ സ്മൃതി നടന്നതിന്റെ അംഗീകാരം ആണ് രാഹുലിന്റെ ഇപ്പോഴത്തെ ‘ ദി ഗ്രേറ്റ് അമേത്തി എസ്‌കേപ്പ് ആക്റ്റ്’. സ്മൃതി ഇറാനി, നിങ്ങള്‍ ഇതാ അമേത്തിയില്‍ മത്സരിക്കാതെ തന്നെ ജയിച്ചു കഴിഞ്ഞു. നെഹ്‌റു കുടുംബത്തിലെ യുവരാജാവിനെ അമേത്തിയുടെ ലേറ്റസ്റ്റ് ചിത്രം തന്നെയാണ് അന്തഃപുരത്തെ കണക്കപ്പിള്ളമാര്‍ കാണിച്ചിട്ടുള്ളത് എന്ന് ചുരുക്കം…