സര്‍ക്കാര്‍ പദ്ധതികളുടെ ഗുണഭോക്താക്കളില്‍ നിന്നും തൃണമൂല്‍ പ്രവര്‍ത്തകര്‍ വിഹിതം പററുന്ന എന്ന ആരോപമം ബംഗാളില്‍ ശക്തമാകുന്നു.’ കട്ട് മണി’ എന്ന പേരില്‍ പാര്‍ട്ടി ഫണ്ടിലേക്കെന്നു പറഞ്ഞാണ് പ്രവര്‍ത്തകര്‍ സാധാരണക്കാരില്‍ നിന്ന് വ്യാപകമായി പണം പിരിക്കുന്നത്. ഇതിനെതിരെ ബിജെപി ഉള്‍പ്പെടെയുള്ള പ്രതിപക്ഷ പാര്‍ട്ടികളെല്ലാം പ്രതിഷേധവുമായി രംഗത്തെത്തികഴിഞ്ഞു. പ്രതിഷേധം ശക്തമായതോടെ ചില പ്രദേശിക നേതാക്കള്‍ പിരിച്ച തുക ആളുകള്‍ക്ക് മടക്കി നല്‍കിയതായും റിപ്പോര്‍ട്ടുകളുണ്ട്.
ഗുണഭോക്താക്കളില്‍ നിന്ന് പണം തട്ടുന്നതിനെതിരെ ബംഗാളിലുടനീളം 40 ല്‍ പരം പ്രതിഷേധങ്ങള്‍ നടന്നു കഴിഞ്ഞു. ജനരോഷം ഭയന്ന് ബീര്‍ഭൂം ജില്ലയിലെ ചത്രയില്‍ ത്രിലോചന്‍ മുഖര്‍ജി എന്ന പ്രാദേശിക നേതാവ് 140 പേര്‍ക്കായി 2.7 ലക്ഷം രൂപ മടക്കി നല്‍കി.
അതേ സമയം കോടിക്കണക്കിനു രൂപ ഈ രീതിയില്‍ തൃണമൂല്‍ പ്രവര്‍ത്തകര്‍ പിരിച്ചെടുത്തതായാണ് ബിജെപി ആരോപികുന്നത്. സംസ്ഥാനത്തെ 63,000 പഞ്ചായത്ത് അംഗങ്ങളില്‍ 10,000 പേരും 1 ലക്ഷം തൃണമൂല്‍ പാര്‍ട്ടി അംഗങ്ങളില്‍ 10,000 പേരും മാത്രമേ കമ്മിഷന്‍ പറ്റിയുള്ളൂ എന്നു കരുതിയാലും 200 കോടിയെങ്കിലും തട്ടിച്ചുവെന്നു കരുതേണ്ടി വരുമെന്ന് ബിജെപി സംസ്ഥാന വൈസ് പ്രസിഡണ്ട് ബിശ്വിപ്രിയ ചൗധരി വ്യക്തമാക്കി .
പാര്‍ട്ടിപ്രവര്‍ത്തകര്‍ക്കെതിരായ പുതിയ ആരോപണം നേരിടാനാവാതെ കുഴങ്ങുകയാണ് മമതാ ബാനര്‍ജി. തെരഞ്ഞെടുപ്പിന് മുമ്പായി സര്‍ക്കാരിന്റെ പ്രതിച്ഛായ നഷ്ടപ്പെടുന്നതില്‍ മമതാ ബാനര്‍ജി കടുത്ത നിരാശയിലാണെന്ന് അടുത്ത വൃത്തങ്ങള്‍ സൂചിപ്പിക്കുന്നു.
Discussion about this post