ഡല്‍ഹി: ശ്രീലങ്കയില്‍ അടിസ്ഥാന സൗകര്യ വികസനത്തിന് ഇന്ത്യ 3,200 കോടി രൂപയും ഭീകര ഭീഷണി നേരിടാന്‍ 3,50 കോടി രൂപയും പ്രത്യേക വായ്പയായി നല്‍കുമെന്ന് പ്രധാനമന്ത്രി നരേന്ദ്ര മോദി.
ഇന്ത്യ സന്ദര്‍ശിക്കുന്ന ശ്രിലങ്കന്‍ പ്രസിഡന്റ് ഗോതാബയ രാജപക്സെയുമായുള്ള ചര്‍ച്ചയക്ക് ശേഷം പ്രധാനമന്ത്രി വാര്‍ത്താസമ്മേളനത്തിലാണ് ഇന്ത്യയുടെ ധനസഹായം പ്രഖ്യാപിച്ചത്.
ശ്രീലങ്കയിലെ തമിഴര്‍ക്ക് നീതി ഉറപ്പാക്കണമെന്ന് മോദി രാജപക്സെയോട് ആവശ്യപ്പെട്ടു.
കഴിഞ്ഞ ഏപ്രിലില്‍ ശ്രീലങ്കയിലുണ്ടായ ഭീകരാക്രമണം ചൂണ്ടിക്കാട്ടിയ മോദി, ഭീകരപ്രവര്‍ത്തനത്തെ നേരിടാന്‍ ശ്രീലങ്കയെ ഇന്ത്യ സഹായിക്കുമെന്ന് പറഞ്ഞു. . ഭീകരപ്രവര്‍ത്തനത്തെ സംയുക്തമായി നേരിടാനും ഇരു നേതാക്കളും തീരുമാനിച്ചു. ആഗോള ഭീകര വിരുദ്ധ പോരാട്ടത്തില്‍ ഇന്ത്യയുമായി സഹകരിക്കാന്‍ ശ്രീലങ്ക തയ്യാറാണെന്ന് ഗോതാബയ രാജപക്‌സെ പറഞ്ഞു.
ശ്രീലങ്കയിലെ 2009-ലെ ആഭ്യന്തരയുദ്ധത്തില്‍ വീടു നഷ്ടപ്പെട്ടവര്‍ക്കായി ഇന്ത്യ 46,000 വീടുകള്‍ നിര്‍മ്മിച്ചതായും 14,000 വീടുകള്‍ കൂടി നിര്‍മ്മിക്കുമെന്നും മോദി പറഞ്ഞു.
ഇരുരാജ്യങ്ങളുടെയും 2500 വര്‍ഷം പഴക്കമുള്ള ചരിത്രത്തിലെ പുതിയ അദ്ധ്യായമാണെന്നും ഗോതബായയുടെ സന്ദര്‍ശനം ഇന്ത്യാ – ശ്രീലങ്ക ബന്ധം കൂടുതല്‍ ശക്തിപ്പെടുത്തുമെന്നും അദ്ദേഹം പറഞ്ഞു.
ശ്രീലങ്കന്‍ പ്രസിഡന്റായി തിരഞ്ഞെടുക്കപ്പെട്ടയുടന്‍ തന്നെ ഇന്ത്യയിലേക്ക് ക്ഷണിച്ചതിന് ഗോതാബയ നന്ദി പറഞ്ഞു. ശ്രീലങ്കന്‍ കസ്റ്റഡിയിലുള്ള എല്ലാ ഇന്ത്യന്‍ മത്സ്യബന്ധന തൊഴിലാളികളെയും വിട്ടയയ്ക്കുമെന്ന് അദ്ദേഹം പ്രഖ്യാപിച്ചു.
ശ്രീലങ്കന്‍ പ്രസിഡന്റായി ചുമതലയേറ്റ ശേഷമുള്ള ഗോതാബയയുടെ ആദ്യ വിദേശ സന്ദര്‍ശനമാണിത്. അദ്ദേഹത്തിന് രാഷ്ട്രപതി ഭവനില്‍ രാഷ്ട്രപതി രാംനാഥ് കോവിന്ദ് സ്വീകരണം നല്‍കി. വിദേശകാര്യ മന്ത്രി എസ്. ജയശങ്കറുമായും ഗോതാബയ കൂടിക്കാഴ്ച നടത്തി.
Discussion about this post