ഇസ്ലാമിക സ്റ്റേറ്റിന്റെ തലപ്പത്തേക്ക് പുതിയ തലവന് എത്തിയതായി അന്താരാഷ്ട്രമാദ്ധ്യമങ്ങള് റിപ്പോര്ട്ട് ചെയ്യുന്നു. ഇറാഖിലെ യസീദികളെ കൂട്ടക്കൊല ചെയ്യാന് മുന്കൈയ്യെടുത്ത അമിര് മുഹമ്മദ് അബ്ദുള് റഹ്മാന് അല് അവ്ലി അല് സല്ബിയാണ് ഇസ്ലാമിക സ്റ്റേറ്റിന്റെ പുതിയ തലവനായിരിയ്ക്കുന്നത്. മുന് തലവന് അബൂബക്കര് അല് ബാഗ്ദാദിയെ അമേരിക്ക വധിച്ചതിന്റെ തൊട്ടുപിന്നാലേ തന്നെ അല് സല്ബിയെ അടുത്ത തലവനായി തിരഞ്ഞെടുത്തിരുന്നെന്നും വിവിധ രഹസ്യാന്വേഷണ ഏജന്സികളെ ഉദ്ധരിച്ച് അന്താരാഷ്ട്രമാദ്ധ്യമങ്ങള് റിപ്പോര്ട്ട് ചെയ്യുന്നു.
ഇറാഖിലെ അതിന്യൂനപക്ഷമായ യസീദികളെ കൂട്ടക്കൊല ചെയ്യാനും അവരിലെ സ്ത്രീകളെ ബലാത്സംഗം ചെയ്യുകയും ലൈംഗിക അടിമകളാക്കുകയും ചെയ്യാനും മാംസക്കച്ചവടത്തിനായി പലയിടത്തേക്കും കടത്താനും മുന്കൈയ്യെടുത്ത ഭീകരനേതാവാണ് അല് സാല്ബി. ഐസിസിന്റെ സ്ഥാപകനേതാക്കളിലൊരാളായ ഇയാള് ഐസിസ് നേതൃത്വനിരയിലുള്ള ചുരുക്കം ചില അറബികളില് ഒരാളാണ്. ഇറാഖിലെ ഒരു ചെറുപട്ടണത്തില് ജനിച്ച ഇയാള് ‘ഹാജി അബ്ദുള്ള’ എന്ന വിളിപ്പേരിലാണ് അറിയപ്പെടുന്നത്.
മൊസുള് സര്വകലാശാലയില് നിന്ന് ‘ശരിയ’ നിയമത്തില് ബിരുദമെടുത്ത ഇയാള് യസീദികളെ കൊന്നൊടുക്കുന്നതിനും അതിക്രൂരപീഡനങ്ങളേല്പ്പിക്കുന്നതിനും താത്വികവും മതപരവുമായ ന്യായീകരണങ്ങള് കണ്ടെത്തുകയും ചെയ്തിരുന്നു. അല് ബാഗ്ദാദിയുടെ സമയം മുതല് തന്നെ ഐസിസിന്റെ താത്വികാചാര്യനും മതപരമായ കാര്യങ്ങളിലെ അവസാന വാക്കുമായിരുന്നു ഇയാള്. ഇയാളുടെ ഏക സഹോദരന് അദെല് സാല്ബി തുര്ക്കിയില് താമസിക്കുകയാണ്. തുര്ക്കിയിലെ രാഷ്ട്രീയപ്പാര്ട്ടിയായ തുര്ക്മെന് ഇറാഖി ഫ്രണ്ട് എന്ന സംഘടനയുടെ നേതാവാണ് അദെല് സാല്ബി.
മറ്റൊരു ഐസിസ് താത്വികാചാര്യന് ഷിഫ അല് നിമ എന്നയാളെ കഴിഞ്ഞ ദിവസം മൊസുള് എന്ന സ്ഥലത്തുനിന്ന് അറസ്റ്റ് ചെയ്തിരുന്നു. 245 കിലോ ഭാരമുണ്ടായിരുന്ന ഇയാളെ നടക്കാന് കഴിയാത്തതിനാല് ലോറിയിലാണ് അറസ്റ്റ് ചെയ്തുകൊണ്ട് പോയത്.
ഐസിസിനോട് നേരിട്ടെതിര്ത്ത് നിന്നിരുന്ന കുര്ദിഷ് വംശജരെ സഹായിക്കാതെ അമേരിക്കന് പട്ടാളക്കാരെ മേഖലയില് നിന്ന് ട്രമ്പ് പിന്വലിച്ചിരുന്നു. അതോടെ തുര്ക്കി കുര്ദുകള്ക്കെതിരേ ആക്രമണം ശക്തമാക്കി. ഒപ്പം ഐസിസിനെ നേരിട്ടെതിര്ത്തിരുന്ന ഇറാന്റെ സൈനികത്തലവന് കാസിം സുലൈമാനിയെ ഡ്രോണ് ആക്രമണത്തില് അമേരിക്ക വധിയ്ക്കുക കൂടി ചെയ്തതോടെ നിലവില് ഐസിസ് വീണ്ടും ശക്തി പ്രാപിച്ചിരിയ്ക്കുകയാണ്.
Discussion about this post