തമിഴ്നാട് നിയമസഭാ തിരഞ്ഞെടുപ്പിന്റെ ചൂടിൽ രാഷ്ട്രീയ കേരളവും തമിഴകവും ഒരേപോലെ ഉറ്റുനോക്കുന്നത് നടൻ വിജയ്യുടെ രാഷ്ട്രീയ അരങ്ങേറ്റത്തെയാണ്. വിജയ് നയിക്കുന്ന ‘തമിഴക വെട്രി കഴകം’ എന്ത് ചലനമുണ്ടാക്കുമെന്ന ചർച്ചകൾക്കിടയിലാണ് മലയാളത്തിന്റെ മെഗാസ്റ്റാർ മമ്മൂട്ടി ചെന്നൈയിൽ എത്തിയത്.
ചെന്നൈ എയർപോർട്ടിൽ വെച്ച് മാധ്യമപ്രവർത്തകർ വിജയ്യുടെ രാഷ്ട്രീയത്തെക്കുറിച്ച് ചോദിച്ച ചോദ്യത്തിന് മമ്മൂട്ടി നൽകിയ മറുപടിയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. പുതിയ ചിത്രമായ ‘പേട്രിയറ്റി’ന്റെ പ്രൊമോഷന്റെ ഭാഗമായാണ് മമ്മൂട്ടി ചെന്നൈയിൽ പറന്നിറങ്ങിയത്. എയർപോർട്ടിൽ വെച്ച് മാധ്യമങ്ങൾ വളഞ്ഞപ്പോൾ “വിജയ്യുടെ രാഷ്ട്രീയത്തെ എങ്ങനെ നോക്കിക്കാണുന്നു?” എന്ന ചോദ്യമുയർന്നു. ഉടൻ തന്നെ തമിഴിൽ “ഒന്നുമേ തെരിയാത്, ആളെ വിടുങ്കോ” (ഒന്നും അറിയില്ല, എന്നെ വിട്ടേക്കൂ) എന്ന് പറഞ്ഞ് മമ്മൂട്ടി പോകുകയിരുന്നു.
മമ്മൂട്ടിയുടെ മറുപടി അനാവശ്യ വിവാദങ്ങൾ ഒഴിവാക്കാനാണെന്ന് ഒരു വിഭാഗം പറയുമ്പോൾ, താരത്തിന്റെ തമിഴ് സ്റ്റൈലിനെ ആരാധകർ പ്രകീർത്തിക്കുകയാണ്. താരത്തിന്റെ ചെന്നൈ സന്ദർശനം അദ്ദേഹത്തിന്റെ ഏറ്റവും പുതിയ ബിഗ് ബജറ്റ് ചിത്രമായ ‘പേട്രിയറ്റി’ന്റെ പ്രചാരണത്തിനാണ്. നീണ്ട 18 വർഷത്തെ ഇടവേളയ്ക്ക് ശേഷമാണ് മലയാള സിനിമയിലെ വിസ്മയങ്ങളായ മമ്മൂട്ടിയും മോഹൻലാലും ഒരു സ്ക്രീനിൽ ഒന്നിക്കുന്നത്.
മഹേഷ് നാരായണൻ സംവിധാനം ചെയ്യുന്ന ഈ ചിത്രം മെയ് 1-ന് തിയേറ്ററുകളിലെത്തും.
