ആമസോണ് മേധാവിയായ ജെഫ് ബെസോസിന്റെ മൊബൈല് ഫോണ് സൗദി കിരീടാവകാശിയായ മുഹമ്മദ് ബിന് സല്മാന് ഹാക് ചെയ്തതായി ബ്രിട്ടീഷ് മാദ്ധ്യമമായ ഗാര്ഡിയന് റിപ്പോര്ട്ട് ചെയ്യുന്നു. വാഷിംഗ്ടന് പോസ്റ്റ് ഉള്പ്പെടെയുള്ള മാദ്ധ്യമങ്ങളുടെ ഉടമസ്ഥനായ ജെഫ് ബെസോസിന് സൌദി കിരീടാവകാശിയില് നിന്ന് ലഭിച്ച ഒരു വാട്സാപ്പ് സന്ദേശം വഴിയാണ് ഫോണ് ഹാക് ചെയ്തതെന്നാണ് റിപ്പോര്ട്ടുകള് പറയുന്നത്.
2018 മേയ് മാസം ഒന്നാം തീയതിയാണ് ജെഫ് ബെസോസിന്റെ മൊബൈല് ഫോണിലേക്ക് സൌദി കിരീടാവകാശി ഒരു വീഡിയോ അയച്ചുകൊടുത്തതെന്നാണ് റിപ്പോര്ട്ടില് പറയുന്നത്. എന്ത് വീഡീയോ ആണ് അയച്ചതെന്ന് പുറത്തു വന്നിട്ടില്ല. ആഴ്ചകള്ക്ക് മുന്പ് ജെഫ് ബെസോസും സൌദി കിരീടാവകാശി മുഹമ്മദ് ബിന് സല്മാനും ഹോളിവുഡില് വച്ച് നടന്ന ആഘോഷവിരുന്നുകള്ക്കിടയില് കണ്ടുമുട്ടിയിരുന്നു.
സൗദി കിരീടാവകാശിയുടെ സ്വന്തം മൊബൈല് ഫോണില് നിന്ന് വാട്സാപ്പ് സന്ദേശമായി വീഡിയോ ലഭിച്ച ജെഫ് ബെസോസ് അത് ഒരു മാല്വെയര് ഒളിപ്പിച്ചുകടത്തിയ വീഡിയോ ആണെന്നറിയാതെ തുറക്കുകയും മണിക്കൂറുകള്ക്കുള്ളില് ബെസോസിന്റെ മൊബൈല് ഫോണില് ഉണ്ടായിരുന്ന വിവരങ്ങള് മുഴുവന് തല്പ്പരകക്ഷികള് ചോര്ത്തുകയും ചെയ്തു എന്നാണ് റിപ്പോര്ട്ട് പറയുന്നത്. ഉടമസ്ഥരറിയാതെ വിവരങ്ങള് ചോര്ത്തുന്ന പ്രോഗ്രാമുകളാണ് മാല്വെയറുകള്.
ജെഫ് ബെസോസിന്റെ ഉടമസ്ഥതയിലുള്ള വാഷിംഗ്ടണ് പോസ്റ്റില് സ്ഥിരമായി എഴുതുമായിരുന്ന ജമാല് ഖഷോഗി എന്ന എഴുത്തുകാരനെപ്പറ്റിയുള്ള വിവരങ്ങള് ലഭിക്കാനാണോ ഈ ഹാക്കിങ്ങ് നടത്തിയതെന്നാണ് സംശയമെന്ന് വിദഗ്ധര് പറയുന്നു. ജെഫ് ബെസോസിന്റെ അടുത്ത സുഹൃത്തും സൌദി അറേബ്യന് പൌരനുമായ ജമാല് ഖഷോഗി സൌദി ഭരണകൂടത്തിന് അനഭിമതനായിരുന്നു. സൌദി അറേബ്യയ്ക്കും മുഹമ്മദ് ബിന് സല്മാനുമെതിരേ വാഷിംഗ്ടണ് പോസ്റ്റില് ഖഷോഗി നിരന്തരം ലേഖനങ്ങള് എഴുതിയിരുന്നു.
2018 ഒക്ടോബര് 2 ന് ഇസ്താംബൂളിലെ സൌദി കോണ്സുലേറ്റില് തന്റെ വിവാഹത്തിനായി ചില രേഖകള് ലഭിക്കാന് പോയ ഖഷോഗിയെ അവിടെ വച്ച് കാണാതായി. ഖഷോഗി സൌദി കോന്സുലേറ്റിനുള്ളില് വച്ച് കൊല്ലപ്പെട്ടെന്നും ശരീരം കഷണങ്ങളാക്കി പുറത്തുകൊണ്ടു പോയിക്കളഞ്ഞെന്നുമുള്ള വിവരം പിന്നീട് പുറത്തുവന്നു. സൌദി കിരീടാവകാശി പിന്നീട് ഖഷോഗി കോണ്സുലേറ്റില് വച്ച് കൊല്ലപ്പെട്ട കാര്യം ശരിവയ്ക്കുകയും ചെയ്തു.
അത് മാത്രമല്ല, മാസങ്ങള്ക്ക് ശേഷം 2019 ജനുവരി മാസത്തില് ജെഫ് ബെസോസിന്റെ വളരെ സ്വകാര്യമായ ചില വിവരങ്ങള് നാഷണല് എന്ക്വയറര് എന്ന ടാബ്ലോയ്ഡ് പ്രസിദ്ധീകരിച്ചു. ജെസ് ബെസോസും ടെലിവിഷന് അവതാരികയായ ലൊറെന് സാഞ്ചേസും തമ്മില് വിവാഹേതരബന്ധമുണ്ടെന്നുള്ള വിവരങ്ങളായിരുന്നു അത്. ജെഫ് ബെസോസ് ലൊറേന് സാഞ്ചേസിനയച്ച സ്വകാര്യ മെസേജുകള് വരെ നാഷണല് എന്ക്വയറര് പ്രസിദ്ധീകരിച്ചു. ജെഫ് ബെസോസും ഭാര്യ മാക്ള്കെന്സിയും ഇതോടെ വിവാഹമോചിതരായി.
ഇതേത്തുടര്ന്ന് താനും ലൊറെന് സാഞ്ചേസും തമ്മിലുള്ള സ്വകാര്യ ചിത്രങ്ങള് കൂടി പ്രസിദ്ധീകരിക്കാതിരിക്കാന് നാഷണല് എന്ക്വയറര് ഉടമസ്ഥനായ ഡേവിഡ് പെക്കര് പണമാവശ്യപ്പെട്ടു എന്ന് പറഞ്ഞ് ജെഫ് ബെസോസ് ബ്ലോഗ് എഴുതിയിരുന്നു. അമേരിക്കന് പ്രസിഡന്റ് ഡൊണാള്ഡ് ട്രമ്പിന്റെ അടുത്ത സുഹൃത്താണ് ഡേവിഡ് പെക്കര്. ജെഫ് ബെസോസിന്റെ കാമുകിയായ ലൊറെന് സാഞ്ചേസും മാസങ്ങള്ക്കുള്ളില് തന്റെ വിവാഹബന്ധം വേര്പെടുത്തി.
ഡൊണാള്ഡ് ട്രമ്പ് ഇതേച്ചൊല്ലി ബെസോസിനെ ട്വിറ്ററിലൂടെ കളിയാക്കിയിരുന്നു. വാഷിംഗ്ടണ് പോസ്റ്റില് സ്ഥിരം വരുന്ന മഞ്ഞവാര്ത്തകള് പോലെ ജെഫ് ബെസോസിന്റെ മഞ്ഞവാര്ത്തകളും പുറത്തു വന്നോ എന്ന രീതിയിലാണ് ട്രംപ് ട്വീറ്റ് ചെയ്തത്. ഡൊണാള്ഡ് ട്രമ്പിനെപ്പറ്റി നിരന്തരം മോശം വാര്ത്തകള് വാഷിംഗ്ടണ് പോസ്റ്റില് നല്കുന്നതിനാല് ജെഫ് ബെസോസും ട്രമ്പും തമ്മില് നല്ല ബന്ധത്തിലല്ല എന്നത് രഹസ്യമല്ല.
ലോകത്തെ ഏറ്റവും വലിയ വിവരസാങ്കേതികവിദ്യാ കമ്പനികളിലൊന്നായ ആമസോണിന്റെയും ലോകത്തെ ഏറ്റവും വലിയ പത്രങ്ങളിലൊന്നായ വാഷിംഗ്ടണ് പോസ്റ്റിന്റേയും ഉടമസ്ഥന്റെ മൊബൈല് ഫോണ് വെറുമൊരു വാട്സാപ്പ് വീഡിയോ അയച്ച് ഹാക് ചെയ്തെന്നത് അവിശ്വസനീയമാണെന്നും സൌദി കിരീടാവകാശിയ്ക്ക് നേരെ ആരോപണങ്ങള് ഉണ്ടാക്കുവാനും ഖഷോഗിയുടെ കൊലപാതകത്തില് സൌദി കിരീടാ!വകാശിക്ക് നേരിട്ട് പങ്കുണ്ടെന്ന് വരുത്തുവാനും കെട്ടിച്ചമച്ച കഥകളാണിത് എന്നാണ് ജെഫ് ബെസോസിന്റെ എതിരാളികള് അഭിപ്രായപ്പെടുന്നത്.
അഥവാ വീഡിയോ അയച്ച് ആരെങ്കിലും മൊബൈല് ഫോണ് ഹാക് ചെയ്താലും സൌദി കിരീടാവകാശി നേരിട്ട് ജെഫ് ബെസോസിനു മാല്വെയര് കടത്തിയ വീഡിയോ അയച്ചുകൊടുക്കാനും വേണ്ട ബുദ്ധിയില്ലായ്മ കാട്ടുമോ എന്നാണ് അവര് ചോദിക്കുന്നത്.
Discussion about this post