ഡൽഹി: രാഷ്ട്രത്തിന്റെ പുരോഗതി യുവാക്കളുടെ കൈകളിലാണെന്ന് രാഷ്ട്രപതി രാമ്നാഥ് കോവിന്ദ്. 71ആം റിപ്പബ്ലിക് ദിനത്തിനോടനുബന്ധിച്ച് രാഷ്ട്രത്തെ അഭിസംബോധന ചെയ്യുകയായിരുന്നു അദ്ദേഹം.
ഇന്ത്യൻ ഭരണഘടന പൗരന്മാർക്ക് അവകാശങ്ങൾ ഉറപ്പ് വരുത്തുന്നു. സ്വാതന്ത്ര്യം. സമത്വം, സാഹോദര്യം, നീതി എന്നിവ ഭരണഘടന ഉറപ്പ് നൽകുന്നവയാണ്. മഹാത്മാഗാന്ധിയുടെ ആശയങ്ങൾ നിത്യജീവിതത്തിൽ പാലിക്കുന്നത് ഭരണഘടനയോടുള്ള ആഭിമുഖ്യം വളർത്തുമെന്നും അദ്ദേഹം പറഞ്ഞു.
“നമ്മുടെ ഭരണഘടന ഒരു സ്വതന്ത്ര ജനാധിപത്യ രാഷ്ട്രത്തിന്റെ പൗരന്മാരെന്ന നിലയിൽ നമുക്ക് അവകാശങ്ങൾ നൽകുന്നു, മാത്രമല്ല നമ്മുടെ ജനാധിപത്യത്തിന്റെ കേന്ദ്ര തത്ത്വങ്ങളായ നീതി, സ്വാതന്ത്ര്യം, സമത്വം, സാഹോദര്യം എന്നിവ എല്ലായ്പ്പോഴും പാലിക്കേണ്ട ഉത്തരവാദിത്തവും നമുക്ക് നൽകുന്നു. നമ്മുടെ രാഷ്ട്രപിതാവിന്റെ ജീവിതവും മൂല്യങ്ങളും പിന്തുടർന്നാൽ ഈ ഭരണഘടനാ ആശയങ്ങൾ പിന്തുടരാൻ നമുക്ക് അനായാസം സാധിക്കും. അങ്ങനെ ചെയ്യുന്നതിലൂടെ, ഗാന്ധിജിയുടെ 150-ാം ജന്മവാർഷികാഘോഷത്തിന് നാം അർത്ഥവത്തായ ഒരു മാനം നൽകും, ”രാഷ്ട്രപതി പ്രസംഗത്തിൽ പറഞ്ഞു.
“പുതിയ ഇന്ത്യ” യുടെ ആവിർഭാവത്തിന് രാജ്യത്തെ യുവാക്കൾ നേതൃത്വം നൽകുന്നുണ്ടെന്നും ഗാന്ധിജിയുടെ
ആശയങ്ങൾ അവർ ഹൃദയത്തോട് ചേർത്തുവയ്ക്കണമെന്നും രാജ്യത്തെ യുവാക്കൾക്കുള്ള സന്ദേശത്തിൽ രാഷ്ട്രപതി പറഞ്ഞു.
ഒരു ലക്ഷ്യത്തിനായി പോരാടുമ്പോൾ ജനങ്ങൾ, വിശിഷ്യ രാജ്യത്തെ യുവാക്കൾ, ഗാന്ധിജി മാനവികതയ്ക്ക് നൽകിയ അഹിംസ എന്ന സംഭാവന മറക്കരുതെന്നും അദ്ദേഹം ഓർമ്മിപ്പിച്ചു. രാജ്യത്തെ കലാലയങ്ങളിലും തെരുവീഥികളിലും യുവാക്കൾ സമരം ചെയ്യുമ്പോൾ അക്രമങ്ങൾ അരങ്ങേറുകയും പൊതുമുതൽ നശിപ്പിക്കപ്പെടുകയും ചെയ്യുന്ന പശ്ചാത്തലത്തിലായിരുന്നു രാഷ്ട്രപതിയുടെ ഓർമ്മെടുത്തൽ.
രാഷ്ട്രത്തിന്റെ സമൂലമായ ഭാവി നിർണ്ണയിക്കാനുള്ള പരമാധികാരം അടിസ്ഥാനപരമായി ജനങ്ങളിൽ നിക്ഷിപ്തമാണെന്ന് രാഷ്ട്രപതി രാമ്നാഥ് കോവിന്ദ് പറഞ്ഞു.
കേന്ദ്ര സർക്കാരിന്റെ വിവിധ പദ്ധതികൾ പരാമർശിച്ച രാഷ്ട്രപതി, അവ രാജ്യത്തെ നിരവധി പൗരന്മാരെ ശാക്തീകരിക്കുന്നതിനും അവരെ ദാരിദ്ര്യത്തിൽ നിന്ന് കരകയറ്റുന്നതിനും സഹായിച്ചതായി വ്യക്തമാക്കി.
ഇന്ത്യയുടെ ബഹിരാകാശ നേട്ടങ്ങളെക്കുറിച്ച് പരാമർശിച്ച രാഷ്ട്രപതി രാമ്നാഥ് കോവിന്ദ്, ഐ എസ് ആർ ഓയുടെ നേട്ടങ്ങളിൽ രാജ്യം അഭിമാനിക്കുന്നുവെന്നും വ്യക്തമാക്കി.
