കൊറോണ വൈറസ് ബാധയേറ്റ് ഇന്ത്യയിൽ ആദ്യത്തെ മരണം റിപ്പോർട്ട് ചെയ്തു.76 വയസ്സുള്ള കർണാടകയിലെ മുഹമ്മദ് ഹുസൈനാണ് മരിച്ചത്.
മുഹമ്മദ് ഹുസൈൻ, കഴിഞ്ഞ ജനുവരി 29ന് സൗദി അറേബ്യയിൽ ഉംറ ചടങ്ങിനായി പോയിരുന്നു. തിരിച്ചു കൽബുർഗിയിലേക്ക് വന്നത് ഹൈദരാബാദ് വഴിയാണ്. നേരത്തെ ആസ്മ രോഗിയായിരുന്ന ഹുസൈന് വീട്ടിൽ എത്തുമ്പോൾ തന്നെ ചുമയും മറ്റു ലക്ഷണങ്ങളും തുടങ്ങി. പനി കൂടി ബാധിച്ചതോടെ മാർച്ച് 6-ന് ഡോക്ടറെ വീട്ടിലേക്ക് വിളിപ്പിച്ചു പരിശോധിച്ചുവെങ്കിലും കുഴപ്പം ഒന്നും കണ്ടെത്താനായില്ല. പനിയും ചുമയും കൂടുതലായതോടെ മാർച്ച് ഒമ്പതിന് കൽബുർഗിലെ സ്വകാര്യ ആശുപത്രിയിൽ പ്രവേശിപ്പിച്ചിരുന്നു. പ്രാഥമിക പരിശോധനയിൽ നെഗറ്റീവ് ആണെന്ന് തെളിഞ്ഞുവെങ്കിലും, കൊറോണ ബാധയാണെന്ന് സംശയിച്ച ഡോക്ടർമാർ സാമ്പിൾ ബാംഗ്ലൂരിലേക്ക് അയച്ചു. രോഗിക്ക് തന്നെ പ്രത്യേക ഐസൊലേഷൻ വാർഡ് സജ്ജമാക്കി.എന്നാൽ, ഡോക്ടർമാരുടെ നിർദ്ദേശങ്ങളെ അവഗണിച്ചു ബന്ധുക്കൾ മുഹമ്മദ് ഹുസൈനെ ഹൈദരാബാദിലെ സ്വകാര്യ ആശുപത്രിയിലേക്ക് കൊണ്ടു പോയി.അവിടെ നിന്നും മടങ്ങുന്ന വഴിക്കായിരുന്നു മരണം.
ഹുസൈന്റെ സംസ്കാരം ആരോഗ്യവകുപ്പിന്റെ മേൽനോട്ടത്തിലാണ് നടന്നത്. രോഗിയുമായി സമ്പർക്കത്തിലുണ്ടായിരുന്ന എല്ലാവരെയും കണ്ടെത്താൻ ഊർജ്ജിതമായ ശ്രമങ്ങൾ ആരംഭിച്ചിട്ടുണ്ട്.സമുദായ നേതാവായതിനാൽ, ഇദ്ദേഹത്തെ കൂടുതൽ പേർ വീട്ടിൽ കാണാൻ എത്തിയിട്ടുമുണ്ടായിരുന്നു.
Discussion about this post