കോവിഡ്-19ന്റെ സാമൂഹിക വ്യാപനസാധ്യത കണക്കിലെടുത്ത് അടിസ്ഥാനസൗകര്യങ്ങൾ ലഭ്യമാക്കി കേന്ദ്രസർക്കാർ.നിലവിലെ സാഹചര്യത്തിൽ സാമൂഹിക വ്യാപന സാധ്യത തള്ളിക്കളയാനാവില്ല എന്നിരിക്കെ, കനത്ത ജാഗ്രതയിലാണ് കേന്ദ്രം. താൽക്കാലികമായി ആശുപത്രികളും വെന്റിലേറ്ററുകളും സ്ഥാപിക്കുന്നത് തകൃതിയായി നടന്നു വരുന്നു.ഇവയ്ക്കായി റെയിൽവേയുടെയും പട്ടാളത്തിന്റെയും സൗകര്യങ്ങൾ കൂടി പൊതുജനങ്ങൾക്കായി ഉപയോഗപ്പെടുത്താനാണ് തീരുമാനം.
നിലവിൽ ഇതുവരെ സാമൂഹിക വ്യാപനം ഇന്ത്യൻ മെഡിക്കൽ റിസർച്ച് കൗൺസിലോ ആരോഗ്യ മന്ത്രാലയമോ സ്ഥിരീകരിച്ചിട്ടില്ല, എങ്കിലും ഏതു നിമിഷവും അതുണ്ടായേക്കുമെന്ന സ്ഥിതി മുന്നിൽ കണ്ട് സകല സൗകര്യങ്ങളും കേന്ദ്രസർക്കാർ ഒരുക്കുകയാണ്.കോവിഡ് രോഗബാധിതർക്ക് വേണ്ടി പ്രത്യേക ആശുപത്രികൾ നിർമിക്കാൻ, കേന്ദ്രം എല്ലാ സംസ്ഥാന സർക്കാരുകൾക്ക് നിർദേശം നൽകിയിട്ടുണ്ട്.17 സംസ്ഥാനങ്ങളിൽ നിലവിൽ പ്രത്യേക ആശുപത്രികൾ ആരംഭിച്ചു കഴിഞ്ഞു. സൈന്യത്തിന്റെ കീഴിലുള്ള 28 ആശുപത്രികൾ പൊതുജനങ്ങൾക്കായി തുറന്നു നൽകാൻ അവർ തീരുമാനിച്ചിട്ടുണ്ട്.രണ്ടു മാസത്തിനകം, മുപ്പതിനായിരം വെന്റിലേറ്ററുകൾ പുറത്തിറക്കാൻ ഭാരത് ഇലക്ട്രോണിക്സ് ലിമിറ്റഡ് തയ്യാറെടുത്തു തുടങ്ങി.
