ഡല്ഹി: ഏഷ്യയിലെ തന്നെ ഏറ്റവും വലിയ കൊവിഡ് വ്യാപനത്തിനിടയാക്കിയ മതസമ്മേളനം സംഘടിപ്പിച്ച നിസാമുദ്ദീന് മര്ക്കസ് തലവന് മൗലാനാ സാദ് മൊബൈല് സ്വിച്ച് ഓഫ് ചെയ്ത് മുങ്ങി. സാദ് ഒളിവിലെന്നാണ് ഡല്ഹി പൊലീസ് വിശദീകരിക്കുന്നത്. അതേസമയം താന് സെല്ഫ് ക്വാറന്റൈനില് ആണെന്ന് അറയിക്കുന്ന ഒരു ഓഡിയോ ക്ലിപ്പ് ബുധനാഴ്ച സാദ് പുറത്തു വിട്ടിരുന്നു.ഇതോടെ മൗലാനാ സാദ് ബുധനാഴ്ച പുറത്തു വിട്ട ശബ്ദ ശകലത്തിന്റെ ഐ.പി അഡ്രസ് കണ്ടു പിടിക്കുന്നതിനായി ക്രൈംബ്രാഞ്ച് സൈബര് വിദഗ്ധരെയും നിയോഗിച്ചിട്ടുണ്ട്.
കൊവിഡ് പടരുന്ന പശ്ചാത്തലത്തില് അതിനെ വകവെക്കാതെ മര്ക്കസില് താമസിക്കാന് ആളുകളെ പ്രേരിപ്പിച്ചു എന്ന് കാണിച്ച്് ഡല്ഹി പൊലീസ് ഇയാള്ക്കെതിരെ എഫ്.ഐ.ആര് ഫയല് ചെയ്തിരുന്നു. സാദിനെ കണ്ടു പിടിക്കാന് വിവിധ സംഘങ്ങളെയും ദല്ഹി പൊലീസ് ഇതിനോടകം നിയോഗിച്ചിട്ടുണ്ട്. ഉത്തര് പ്രദേശില് രണ്ടു പൊലീസ് ടീമുകളെ നിയോഗിച്ചിട്ടുണ്ടെന്ന് ഡല്ഹി പൊലീസ് പറഞ്ഞതായി ഇന്ത്യടുഡേ ടിവി റിപ്പോര്ട്ടു ചെയ്തു.
ഒരു സംഘം ഇയാള് ഒളിച്ചു താമസിക്കാനിടയുള്ള പള്ളികളിലും പരിസരങ്ങളിലും നരീക്ഷിച്ചു വരികയാണ്.അതേസമയം സാദിന്റെ ബന്ധുക്കളെയും ചോദ്യം ചെയ്ത് വരികയാണ്. എഫ്ഐആര് രജിസ്ട്രര് ചെയ്ത വാര്ത്ത പുറത്ത് വന്നതിന് പിറകെ മൗലാനയുടെ മൊബൈല് സ്വിച്ച് ഓഫ് ആയി. എവിടെയാണെന്ന് അറിയില്ലെന്നാണ് ബന്ധുക്കളും അനുയായികളും പറയുന്നത്.
രാജ്യത്ത് തബ്ലീഗ് സമ്മേളനത്തില് പങ്കെടുത്തവര്ക്ക് കൊവിഡ് സ്ഥിരീകരിച്ചതോടെയാണ് വലിയ തോതില് വൈറസ് ബാധിതരുടെ എണ്ണം വര്ധിച്ചതെന്ന് ആരോഗ്യവകുപ്പ് ജോ. സെക്രട്ടറി ലാവ് അഗര്വാള് പറഞ്ഞിരുന്നു. സമ്മേളനത്തില് പങ്കെടുത്ത നിരവധി പേരാണ് രാജ്യത്ത് മരിച്ചത്. മുംബൈയിലെ ധാരാവിയില് കൊവിഡ് ബാധിച്ച് മരിച്ച വ്യകതിയും സമ്മേളനത്തില് പങ്കെടുത്തയാളാണ്.ഈ സാഹചര്യത്തില് സമ്മേളനത്തിലുണ്ടായിരുന്നവര് യാത്ര ചെയ്ത ആറ് ട്രെയിനുകളിലെ യാത്രക്കാരെ നിരീക്ഷിക്കാനും കേന്ദ്രം തീരുമാനിച്ചിട്ടുണ്ട്.
Discussion about this post