ഡൽഹി: കൊവിഡ് വ്യാപനവും തുടർന്നുണ്ടായ ലോക്ക് ഡൗണും സൃഷ്ടിച്ച പ്രതിസന്ധി മറികടക്കാൻ മൂന്ന് ലക്ഷം കോടി രൂപയുടെ സമഗ്ര സാമ്പത്തിക പാക്കേജ് കേന്ദ്രസർക്കാർ ഉടൻ പ്രഖ്യാപിച്ചേക്കുമെന്ന് സൂചന. ഈയാഴ്ച അവസാനത്തോട് കൂടി കേന്ദ്ര ധനകാര്യ വകുപ്പ് മന്ത്രി നിർമ്മല സീതാരാമൻ പ്രഖ്യാപനം നടത്താനാണ് സാദ്ധ്യത.
തൊഴിലുറപ്പ് പദ്ധതിയിലെ കൂലി വർദ്ധനയാകും പാക്കേജിലെ മുഖ്യ ആകർഷണം. കൂടാതെ സാധാരണക്കാർക്ക് അക്കൗണ്ടുകളിലേക്ക് നേരിട്ട് പണമെത്തിക്കുന്ന പദ്ധതികൾ, കുടിയേറ്റ തൊഴിലാളികള് സ്വന്തം നാടുകളിലേയ്ക്ക് മടങ്ങിയതിനാല് പ്രതിസന്ധി നേരിടുന്ന മേഖലകളില് ജീവനക്കാരെ നിലനിര്ത്തുന്നതിന് കമ്പനികള്ക്ക് ആനുകൂല്യം, ചെറുകിട- ഇടത്തരം സംരംഭങ്ങൾക്ക് മൂലധന സമാഹരണ ലോണുകൾക്കുള്ള ക്രെഡിറ്റ് ഗ്യാരണ്ടി പദ്ധതി എന്നിവയും പ്രഖ്യാപിച്ചേക്കും.
ലോക്ക് ഡൗൺ മൂലമുണ്ടായ സ്തംഭനാവസ്ഥ പരിഹരിക്കാൻ ഓറഞ്ച്, ഗ്രീന് സോണുകളില് ആനുപാതികമായ സാമ്പത്തിക ഇടപെടല്, തീവണ്ടി, വിമാന സര്വീസുകള് പുനഃരാരംഭിക്കല്, രോഗബാധ കാര്യമായ ആഘാതം സൃഷ്ടിച്ച വിനോദസഞ്ചാരം, വാഹന- വ്യോമയാന മേഖലകൾ, ഹോസ്പിറ്റാലിറ്റി, റിസോർട്ട് മേഖലകൾ എന്നിവയെ ഉത്തേജിപ്പിക്കാനുള്ള പ്രഖ്യാപനങ്ങൾ എന്നിവയും സാമ്പത്തിക പാക്കേജിന്റെ ഭാഗമായി ഉണ്ടാകുമെന്നാണ് വിലയിരുത്തൽ.
Discussion about this post