വന്ദേ ഭാരത് മിഷന്‍ രണ്ടാം ഘട്ടം: യു.എ.ഇയില്‍ നിന്ന്​ കേരളത്തിലേക്കെത്തുന്നത്​ ആറ്​​ വിമാനങ്ങള്‍

ഡല്‍ഹി: കൊറോണയെ തുടര്‍ന്ന് വിവിധ രാജ്യങ്ങളില്‍ കുടുങ്ങിക്കിടക്കുന്ന പ്രവാസി ഇന്ത്യക്കാരെ മടക്കിക്കൊണ്ട് വരുന്ന വന്ദേ ഭാരത് മിഷന്റെ രണ്ടാം ഘട്ട ഷെഡ്യുളില്‍ യു.എ.ഇയില്‍ നിന്ന്​ കേരളത്തിലേക്കെത്തുന്നത് ആറു വിമാനങ്ങൾ. മെയ്​ 17 മുതല്‍ 23 വരെ നീളുന്ന രണ്ടാം ഘട്ടത്തില്‍ യു.എ.ഇയില്‍ നിന്ന്​ ആകെ ഒമ്പത്​ വിമാനങ്ങളാണുള്ളത്​.

17ന്​ ഉച്ചക്ക്​ 12.45ന്​ ദുബൈയില്‍ നിന്ന്​ കൊച്ചിയിലേക്ക്​​. 17ന്​ ഉച്ച കഴിഞ്ഞ്​ 3.15ന്​​ അബൂദബിയില്‍ നിന്ന് കൊച്ചിലേക്ക്​. 18ന്​ ഉച്ചക്ക്​ 1.40ന്​ അബൂദബിയില്‍ നിന്ന്​ തിരുവനന്തപുരത്തേക്ക്. 23ന്​ ഉച്ചക്ക്​ 2.30ന്​ അബൂദബിയില്‍ നിന്ന്​ കണ്ണൂരിലേക്ക്​. 23ന്​ ഉച്ചകഴിഞ്ഞ്​ 3.10ന്​ ദുബൈയില്‍നിന്ന്​ കോഴിക്കോടേക്ക്​. 23ന്​ ഉച്ചക്ക്​ 1.45ന്​ ദുബായില്‍ നിന്ന്​ തിരുവനന്തപുരത്തേക്ക് എന്നിങ്ങനെയാണ്​ നിലവില്‍ തയാറാക്കിയിരിക്കുന്ന ഷെഡ്യൂള്‍.

ഈ സമയങ്ങളില്‍ മാറ്റം വരുവാന്‍ സാധ്യതയുണ്ട്​. നാട്ടിലേക്ക്​ അടിയന്തിര യാത്ര തേടുന്നവരുടെ എണ്ണം കൂടുതലായതിനാല്‍ യു.എ.ഇയില്‍ നിന്ന്​ കൂടുതല്‍ വിമാനങ്ങള്‍ ലഭ്യമാക്കണം എന്ന ആവശ്യം ശക്തമാണ്​.

അതേസമയം വന്ദേ ഭാരത് മിഷന്റെ ഇതുവരെയുള്ള പ്രവര്‍ത്തനം വിജയകരമാണെന്ന് കേന്ദ്രം വിലയിരുത്തി. കാര്യമായ പരാതികള്‍ ഒന്നും തന്നെ ഉയരാത്തത് മിഷന്‍ വിജയിക്കുന്നതിന്റെ തെളിവാണെന്നും സര്‍ക്കാര്‍ വൃത്തങ്ങള്‍ ചൂണ്ടിക്കാട്ടി.