ഡല്ഹി : അതിര്ത്തിയില് ചൈനാ-ഇന്ത്യ സംഘര്ഷം ശക്തമാകുമ്പോള് വ്യാപാര രംഗത്തെ ചൈനയെ പൂട്ടാനുള്ള നീക്കങ്ങള് ശക്തമാക്കുകയാണ് ഇന്ത്യന് സര്ക്കാര്. ചൈനിസ് ഉത്പന്നങ്ങള് ബഹിഷ്ക്കരിക്കണമെന്ന വ്യാപകമായ പ്രചാരണം നടക്കുന്നതിനിടയിലാണ് ചൈനയില് നിന്നുള്ള ഇറക്കുമതി കുറയ്ക്കാനുള്ള വിവിധ മാര്ഗങ്ങള് കേന്ദ്രസര്ക്കാര് ആലോചിക്കുന്നത്.
ചൈനിസ് കമ്പനികളെ കരാറുകളില് നിന്ന് വിലക്കിയേക്കും
ഭാവിയില് ചൈനീസ് കമ്പനികളെ കരാറുകളില് പങ്കെടുക്കുന്നതില് നിന്നു വിലക്കുക എന്നതാണ് കേന്ദ്രസര്ക്കാരിന്റെ പരിഗണനയില് ഉള്ള ഒരു വിഷയം.. ആഗോള കരാറുകള് വിളിക്കുമ്പോള് ഇങ്ങനെ വിലക്കാന് കഴിയുമോ എന്ന നിയമവശങ്ങള് പഠിക്കാന് കേന്ദ്രനിയമ മന്ത്രാലയത്തോട് ആവശ്യപ്പെട്ടിട്ടുണ്ട്. ചൈനിസ് കമ്പനികള് ഇന്ത്യയില് വിവിധ നിര്മ്മാണ പ്രവര്ത്തനങ്ങളും നിക്ഷേപവും നടത്താന് ആലോചിക്കുന്നതിനിടെയാണ് കേന്ദ്രത്തിന്റെ നിര്ണായകമായേക്കാവുന്ന ചര്ച്ചകള്
ഇ-കൊമേഴ്സ് കമ്പനികളുടെ ഉത്പന്നങ്ങള് ഇന്ത്യന് നിര്മ്മിതമെന്ന് ഉറപ്പ് വരുത്താന് നിയമ ഭേദഗതി
ഇന്ത്യന് രാജ്യത്തെ ഇ കൊമേഴ്സ് കമ്പനികള് വില്ക്കുന്ന ഉല്പന്നങ്ങള് ഇന്ത്യയില് നിര്മിച്ചതാണെന്ന് ഉറപ്പു വരുത്താന് നിയമഭേദഗതി കൊണ്ടുവരും. ഇന്ത്യന് നിര്മിത ഉല്പന്നമാണെന്ന് അറിയിക്കുന്ന ആത്മനിര്ഭര് ചിഹ്നം സാധനങ്ങളില് പതിക്കണം എന്ന ഭേദഗതിയും കൊണ്ടു വന്നേക്കും.ഇ കെമേഴ്സ് കമ്പനികള് വില്ക്കുന്ന എല്ലാ സാധനങ്ങളിലും ഇന്ത്യയില് നിര്മിച്ചതാണെന്നു രേഖപ്പെടുത്തണം എന്നു തീരുമാനിച്ചിട്ടുണ്ട്. ഡിപ്പാര്ട്മെന്റ് ഓഫ് പ്രൊമോഷന് ഓഫ് ഇന്ഡസ്ട്രി ആന്ഡ് ഇന്റേണല് ട്രേഡ് ആണിതു ചെയ്യേണ്ടത്. ഇതു ചെയ്യാത്തവര്ക്കു പിഴ ചുമത്താനും വ്യവസ്ഥ കൊണ്ടുവരും.
ചൈനിസ് ഉത്പന്നങ്ങള്ക്ക് വേണ്ടി പരസ്യം വേണ്ട
ചൈനീസ് ഉല്പന്നങ്ങള്ക്കു വേണ്ടി പരസ്യം ചെയ്യരുതെന്നു സിനിമാ, കായിക താരങ്ങളോടു വ്യാപാരി സംഘടനകള് അഭ്യര്ഥിക്കുന്നുമുണ്ട്.
ഇറക്കുമതി നികുതി കൂട്ടും
ചൈനയില് നിന്നുള്ള ഉല്പന്നങ്ങള്ക്ക് ഇറക്കുമതിച്ചുങ്കം കൂട്ടാനുള്ള ചര്ച്ചയിലാണ് കേന്ദ്രം. പല വ്യാപാര സംഘടനകളും ഇക്കാര്യം ആവശ്യപ്പെടുന്നുണ്ട്. കളിക്കോപ്പുകള്, ഗൃഹോപകരണങ്ങള്, വളം, മൊബൈലുകള്, ഇലക്ട്രിക് സാധനങ്ങള്, ഇലക്ട്രോണിക് സാധനങ്ങള് എന്നിങ്ങനെ ഇന്ത്യയില് പ്രാദേശിക നിര്മാതാക്കളുമായി മത്സരിച്ചാണ് ചൈനീസ് സാധനങ്ങള് എത്തുന്നത്
സ്പോണ്സര്ഷിപ്പിനും വിലക്ക്
ചൈനക്കെതിരായ നീക്കം ഇനി സ്പോണ്സര്ഷിപ്പുകളെയും ബാധിക്കും. ഇന്ത്യന് ഒളിംപിക് അസോസിയേഷന് (ഐഒഎ) ചൈനീസ് സ്പോര്ട്സ് സാധനങ്ങളും വസ്ത്രങ്ങളും നിര്മിക്കുന്ന ലി നിങ് കമ്പനിയുമായി സ്പോണ്സര്ഷിപ് കരാറില് ഒപ്പു വച്ചിരുന്നു. ടോക്കിയോ ഒളിംപിക്സ് കഴിയുന്നതു വരെയുള്ള കരാറാണിത്. പുതിയ സാഹചര്യത്തില് കരാര് പുനഃപരിശോധിക്കുമെന്ന് ഐഒഎ സെക്രട്ടറി ജനറല് രാജീവ് മേത്ത വ്യക്തമാക്കി. ട്വന്റി 20 ക്രിക്കറ്റ് ലീഗിന് ചൈനീസ് സ്മാര്ട് ഫോണ് നിര്മാതാക്കളായ വിവോയാണ് സ്പോണ്സര്. 2190 കോടി രൂപയുടെ കരാറാണിത്. ഇന്ത്യയില്ത്തന്നെ ഈ തുക ചെലവഴിക്കപ്പെടുമെന്നതിനാല് കരാര് റദ്ദാക്കുന്നത് ശരിയല്ലെന്നാണ് ബിസിസിഐ ട്രഷറര് അരുണ് സിങ്ങിന്റെ വാദം. എന്നാല് ചൈനീസ് കമ്പനികളുമായുള്ള എല്ലാ ഇടപാടും റദ്ദാക്കണമെന്ന് ഹര്ഭജന് സിങ് ആവശ്യപ്പെട്ടതോടെ ഇക്കാര്യം ചര്ച്ചയായിട്ടുണ്ട്.
സ്വദേശി ഉത്പന്നങ്ങളെ പ്രോത്സാഹിപ്പിക്കും
സ്വദേശി ഉത്പന്നങ്ങളെ പ്രോത്സാഹിപ്പിക്കാനുള്ള നയം രൂപീകരിക്കാനും കേന്ദ്രം ആലോചിക്കുന്നു. തദ്ദേശീയമായി നിര്മ്മിക്കുന്ന ഉത്പന്നങ്ങളുടെ പ്രചാരണം ശക്തമാക്കാനുള്ള ക്യാമ്പയിനുകളും പരിഗണനയില് ഉണ്ട്.
Discussion about this post