ഹൈദരാബാദ്: മുൻ പ്രധാനമന്ത്രി പി വി നരസിംഹ റാവുവിന്റെ ജന്മശതാബ്ദി ആഘോഷങ്ങൾ മുസ്ലീം വികാരം വ്രണപ്പെടുത്തുമെന്ന് യുണൈറ്റഡ് മുസ്ലീം ഫോറം. അതിനാൽ ജന്മശതാബ്ദി ആഘോഷം നടത്തരുതെന്ന് സംഘടന തെലങ്കാന മുഖ്യമന്ത്രി കെ ചന്ദ്രശേഖര റാവുവിനോട് ആവശ്യപ്പെട്ടു.
മുൻ പ്രധാനമന്ത്രി നരസിംഹ റാവുവിന്റെ ജന്മശതാബ്ദി ആഘോഷിക്കാനുള്ള തീരുമാനം സംസ്ഥാനത്തെ മുസ്ലീം വിഭാഗത്തിന്റെ വികാരത്തെ വ്രണപ്പെടുത്തുമെന്ന് യുണൈറ്റഡ് മുസ്ലീം ഫോറം മേധാവി റഹീമുദ്ദീന്‍ അന്‍സാരി പറഞ്ഞു. അതിനാല്‍ ഒരു വര്‍ഷം നീണ്ടു നില്‍ക്കുന്ന പരിപാടികള്‍ ആഘോഷിക്കാനുള്ള സര്‍ക്കാര്‍ തീരുമാനം പിന്‍വലിക്കണമെന്നും അൻസാരി കൂട്ടിച്ചേർത്തു. ഒവൈസിയുടെ പാർട്ടിയായ ആൾ ഇന്ത്യ മജ്ലിസ് ഇത്തിഹാദുൾ മുസ്ലീമിനുമായും ജമാ അത്തെ ഇസ്ലാമിയുമായും അടുത്ത ബന്ധം പുലർത്തുന്ന സംഘടനയാണ് യുണൈറ്റഡ് മുസ്ലീം ഫോറം.
അതേസമയം നരസിംഹ റാവുവിന്റെ ജന്മശതാബ്ദി ആഘോഷങ്ങൾക്കെതിരായ മുസ്ലീം സംഘടനകളുടെ വർഗ്ഗീയ പരാമർശം കോൺഗ്രസ്സിനെ വെട്ടിലാക്കിയിരിക്കുകയാണ്. വിഷയത്തിൽ പാർട്ടി നിലപാട് വ്യക്തമാക്കണമെന്ന് ഒരു വിഭാഗം ആവശ്യപ്പെടുന്നു.
