അഹമ്മദാബാദ്: പ്രധാനമന്ത്രി നരേന്ദ്രമോദി സൈഡസ് ബയോടെക് പാർക്കിലെത്തി. കോവിഡ് വാക്സിന്റെ ഗവേഷണത്തിന്റെ പുരോഗതി പരിശോധിക്കാനാണ് അദ്ദേഹം അഹമ്മദാബാദിൽ സ്ഥിതി ചെയ്യുന്ന സൈഡസ് ബയോടെക് പാർക്കിലെത്തിയത്.
ഒരു മണിക്കൂറോളം നേരം അദ്ദേഹം പാർക്കിൽ ചിലവഴിക്കും. ശാസ്ത്രജ്ഞരുമായി സംവദിച്ച് ഗവേഷണത്തിന്റെ പുരോഗതി വിലയിരുത്തിയ ശേഷം, ഹൈദരാബാദിലേക്ക് പറക്കും. കോവിഡ് വാക്സിൻ വികസിപ്പിച്ചു കൊണ്ടിരിക്കുന്ന ഭാരത് ബയോടെക് ഗവേഷണ കേന്ദ്രം സന്ദർശിക്കാനാണ് അദ്ദേഹം ഹൈദരാബാദിലേക്ക് പോകുന്നത്. അവിടെ നിന്നും പൂനെയിലേക്കായിരിക്കും പ്രധാനമന്ത്രിയുടെ അടുത്ത യാത്ര. വാക്സിൻ ഗവേഷണത്തിന്റെ അന്ത്യപാദത്തിൽ എത്തി നിൽക്കുന്ന സെറം ഇന്സ്റ്റിറ്റ്യൂട്ട് ഓഫ് ഇന്ത്യയായിരിക്കും അദ്ദേഹത്തിന്റെ മൂന്നാമത്തെ ലക്ഷ്യസ്ഥാനം.
“കോവിഡ് വിരുദ്ധ പോരാട്ടത്തിൽ രാജ്യം നിർണായക ഘട്ടത്തിലെത്തി നിൽക്കുന്ന ഈ അവസരത്തിൽ, ഗവേഷണങ്ങൾ ത്വരിതപ്പെടുത്താനും ശാസ്ത്രജ്ഞർക്ക് ഊർജ്ജം പകരാനും പ്രധാനമന്ത്രിയുടെ സന്ദർശനം ഉപകരിക്കും” പി.എം ഓഫിസ് ട്വീറ്റ് ചെയ്യുന്നു.
