ഡല്‍ഹി: പ്രതിസന്ധിയില്‍ നിന്ന് കരകയറാന്‍ സംസ്കാരം വളരെയധികം സഹായിക്കുന്നുവെന്ന് പ്രധാനമന്ത്രി നരേന്ദ്രമോദി. കൊവിഡെന്ന ആഗോള പകര്‍ച്ചവ്യാധിയുടെ ഈ കാലത്ത് നമ്മള്‍ സാംസ്കാരിക ബന്ധങ്ങള്‍ കൂടുതല്‍ ശക്തിപ്പെടുത്തുകയാണെന്നും അദ്ദേഹം പറഞ്ഞു. റേഡിയോ പരിപാടിയായ ‘മന്‍ കി ബാത്തിലൂടെ’ രാജ്യത്തെ അഭിസംബോധന ചെയ്യവെയാണ് പ്രധാനമന്ത്രി ഇങ്ങനെ പറഞ്ഞത്.
‘കൊവിഡിനിടയിലും ജനങ്ങള്‍ പൈതൃക വാരം നന്നായി ആഘോഷിക്കുന്നത് രാജ്യം കണ്ടതാണ്. സംസ്കാരം ഒരു വൈകാരികതയാണ്. ഇന്ത്യയുടെ സംസ്കാരം എല്ലായ്പ്പോഴും ലോകത്തെ മുഴുവന്‍ ആകര്‍ഷിക്കുന്ന ഒന്നാണ്. ഇന്ത്യയുടെ സംസ്കാരത്തെക്കുറിച്ച്‌ പഠിക്കാന്‍ മറ്റുരാജ്യങ്ങളില്‍ നിന്ന് നിരവധിപേര്‍ ഇവിടെയെത്തുന്നുണ്ട്. ഇവരില്‍ പലരും ഇന്ത്യയുടെ സാംസ്കാരിക അംബാസഡര്‍മാരായാണ് സ്വന്തം രാജ്യത്തേക്ക് മടങ്ങുന്നത്. അന്നപൂര്‍ണ ദേവിയുടെ വളരെ പഴയ ഒരു വിഗ്രഹം കാനഡയില്‍ നിന്ന് ഇന്ത്യയിലേക്ക് മടക്കിക്കൊണ്ടുവരുന്നതില്‍ നമുക്ക് അഭിമാനിക്കാം. വാരാണസിയിലെ ക്ഷേത്രത്തില്‍ നിന്ന് 100വര്‍ഷത്തിന് മുമ്പ് മോഷ്ടിക്കപ്പെടുകയും രാജ്യത്തിന് പുറത്തേക്ക് കടത്തപ്പെടുകയും ചെയ്ത വിഗ്രഹമാണിത്. രാജ്യത്തെ നിരവധി മ്യൂസിയങ്ങളും ലൈബ്രറികളും അവരുടെ ശേഖരം പൂര്‍ണമായും ഡിജിറ്റല്‍ ആക്കുന്നതിനായി പ്രവര്‍ത്തിക്കുന്നു.
കാര്‍ഷിക കരട് നിയമഭേദഗതി കര്‍ഷക നന്മക്കെന്ന് പ്രധാനമന്ത്രി മന്‍ കി ബാത്തില്‍ പറഞ്ഞു. കര്‍ഷകര്‍ ശാക്തീകരിക്കപ്പെടുകയാണ്. അവര്‍ക്കായി നിരവധി വാതിലുകള്‍ തുറക്കുന്നു. പുതിയ അവകാശങ്ങള്‍ അവര്‍ക്ക് ലഭിക്കുന്നു. അവര്‍ ആഗ്രഹിക്കുന്ന വിലക്ക് ഉത്പന്നങ്ങള്‍ വില്‍ക്കാനാകും. വിശദമായ ചര്‍ച്ചകള്‍ക്ക് ശേഷമാണ് പുതിയ നിയമം നടപ്പാക്കിയതെന്നും പ്രധാനമന്ത്രി വിശദികരിച്ചു.
കര്‍ഷകര്‍ക്ക് അവരുടെ പരാതികള്‍ സബ്ഡിവിഷണല്‍ മജിസ്ട്രേട്ടിനെ അറിയിക്കാമെന്ന് നരേന്ദ്രമോദി അറിയിച്ചു. ഉത്പന്നങ്ങള്‍ക്ക് ന്യായവില നിയമം മൂലം ഉറപ്പിക്കുകയാണ്. പുതിയ നിയമത്തെ കുറിച്ച്‌ കര്‍ഷകരും മനസിലാക്കണമെന്നും അദ്ദേഹം കൂട്ടിച്ചേര്‍ത്തു.
നമ്മള്‍ ശൈത്യകാലത്തേക്ക് കാലെടുത്തുവയ്ക്കുകയാണ്. ചെറി പുഷ്പങ്ങളുടെ ചിത്രങ്ങളാല്‍ ഇന്റര്‍നെറ്റ് നിറഞ്ഞിരിക്കുകയാണ് അവയൊന്നും ജപ്പാനില്‍ നിന്നുളളതല്ല. ഇന്ത്യയിലെ ഷില്ലോംഗില്‍ നിന്നുളളതാണ്’- അദ്ദേഹം പറഞ്ഞു. ന്യൂസിലന്‍ഡ് പാര്‍ലമെന്റില്‍ സംസ്കൃതത്തില്‍ സത്യപ്രതിജ്ഞ ചൊല്ലിയ ഡോ. ഗൗരവ് ശര്‍മ്മയെ മോദി മന്‍കി ബാത്തില്‍ അഭിനന്ദിക്കുകയും ചെയ്തു.
Discussion about this post