തിരുവനന്തപുരം: കേരളത്തിലെ നിയമസഭ തെരഞ്ഞെടുപ്പ് രണ്ടുഘട്ടമായി നടത്തിയേക്കുമെന്ന് റിപ്പോർട്ടുകൾ.ഏപ്രിൽ അവസാനവും മെയ് രണ്ടാം വാരത്തിനും ഇടയിലായിരിക്കും തെരഞ്ഞെടുപ്പ് നടക്കുക.
കേരളമടക്കം തെരഞ്ഞെടുപ്പു നടക്കുന്ന അഞ്ചു സംസ്ഥാനങ്ങളിൽ സ്വീകരിക്കേണ്ട സുരക്ഷാ മാർഗങ്ങളെക്കുറിച്ചും ക്രമീകരണങ്ങളെ കുറിച്ചുമുള്ള ഏകദേശ ധാരണ കേന്ദ്ര തെരഞ്ഞെടുപ്പ് കമ്മീഷനുണ്ട്. എന്നാൽ, ഇവിടങ്ങളിൽ തിരഞ്ഞെടുപ്പ് നടത്തേണ്ട തീയതി സംബന്ധിച്ച് അന്തിമ തീരുമാനം ഇനിയും ആയിട്ടില്ല. തീയതി അടക്കമുള്ള പ്രധാനപ്പെട്ട തീരുമാനങ്ങൾ എടുക്കാൻ സംസ്ഥാനത്തെ മുഖ്യ തിരഞ്ഞെടുപ്പ് ഓഫീസർ, രാഷ്ട്രീയ പാർട്ടികളുടെ പ്രതിനിധികൾ, ചീഫ് സെക്രട്ടറി, പോലീസ് മേധാവി എന്നിവരുമായി ചർച്ച നടത്താൻ കേന്ദ്ര തിരഞ്ഞെടുപ്പ് കമ്മീഷൻ സംഘം അടുത്തയാഴ്ച കേരളത്തിലെത്തും.
ഇക്കുറി വോട്ട് രേഖപ്പെടുത്താൻ ഉപയോഗിക്കുന്നത് പുത്തൻ തലമുറ എം-3 വോട്ടിങ് യന്ത്രങ്ങളാണ്.അനധികൃതമായി തുറക്കാൻ ശ്രമിച്ചാൽ സ്വയം പ്രവർത്തനരഹിതമാകുന്ന ഇവ, ഉന്നത നിലവാരം പുലർത്തുന്നവയാണ്. ബീഹാർ, മഹാരാഷ്ട്ര നിയമസഭാ തിരഞ്ഞെടുപ്പുകളിൽ ഉപയോഗിച്ചതും നിലവിലുള്ള മോഡലുകളിൽ ഏറ്റവും സുരക്ഷിതമായ ഈ മോഡൽ വോട്ടിംഗ് മെഷീൻ ആണ്.
