ഡിആർഡിഒ വികസിപ്പിച്ചെടുത്ത ആകാശ് വ്യോമ പ്രതിരോധ മിസൈൽ സംവിധാനം വാങ്ങാൻ താല്പര്യം പ്രകടിപ്പിച്ച് നിരവധി രാജ്യങ്ങളെത്തിയതായി റിപ്പോർട്ടുകൾ. ആഫ്രിക്ക, യൂറോപ്പ് എന്നീ ഭൂഖണ്ഡങ്ങളിലെ ചില രാജ്യങ്ങളും ഗൾഫ് രാജ്യങ്ങളും ഇന്ത്യയെ സമീപിച്ച രാജ്യങ്ങളിൽ ഉൾപ്പെടുന്നുണ്ട്.
ലഭ്യമായ വിവരങ്ങൾ പ്രകാരം, 9 രാജ്യങ്ങളാണ് ഇതിനോടകം തന്നെ ആകാശ് വ്യോമ പ്രതിരോധ മിസൈൽ സംവിധാനം വാങ്ങാൻ താല്പര്യം പ്രകടിപ്പിച്ച് എത്തിയിട്ടുള്ളത്. പ്രതിരോധ മന്ത്രാലയത്തിന് കീഴിലുള്ള പൊതുമേഖലാ യൂണിറ്റ് കേന്ദ്ര മന്ത്രിസഭയുടെ അനുമതി ലഭിച്ചതിനു ശേഷം ഈ രാജ്യങ്ങളിലേക്ക് ആയുധ സംവിധാനം കയറ്റുമതി ചെയ്യുന്നതിനുള്ള സാധ്യതകൾ പരിശോധിക്കുമെന്ന് അധികൃതർ അറിയിച്ചു. കഴിഞ്ഞദിവസം, വിദേശരാജ്യങ്ങളുമായുള്ള തന്ത്രപരമായ ബന്ധം മെച്ചപ്പെടുത്തുന്നത് ലക്ഷ്യമിട്ട് ആകാശ് മിസൈൽ കയറ്റുമതി ചെയ്യുന്നതിന് മന്ത്രിസഭ അംഗീകാരം നൽകിയിരുന്നു.
25 കിലോമീറ്റർ ദൂര പരിധിയുള്ള ഭൂതല-വ്യോമ മിസൈലാണ് ആകാശ്. ആകാശ് കൂടാതെ, തീരദേശ നിരീക്ഷണ സംവിധാനം, റഡാറുകൾ, എയർ പ്ലാറ്റ്ഫോമുകൾ എന്നിവ വാങ്ങാനും താല്പര്യപ്പെട്ട് വിവിധ രാജ്യങ്ങൾ ഇന്ത്യയെ സമീപിച്ചിട്ടുണ്ട്.
Discussion about this post