ഡൽഹി: രാജ്യം എഴുപത്തിരണ്ടാം റിപ്പബ്ലിക് ദിനം ആഘോഷിക്കുന്ന അവസരത്തിൽ ജനങ്ങൾക്ക് ആശംസകൾ നേർന്ന് രാഷ്ട്രപതി രാമ്നാഥ് കോവിന്ദ്.
ലോകത്തിലെ ഏറ്റവും ശക്തിമത്തും ഊർജ്ജസ്വലവുമായ ജനാധിപത്യ രാജ്യം എഴുപത്തിരണ്ടാമത് റിപ്പബ്ലിക് ദിനം ആഘോഷിക്കുന്ന അവസരത്തിൽ എല്ലാവർക്കും ആശംസകൾ.നാനാത്വത്താലും നിരവധി ഉത്സവങ്ങളാലും സമ്പുഷ്ടമായ നമ്മുടെ രാജ്യത്ത് നമ്മുടെ ദേശീയോത്സവങ്ങൾ ഏവരും ദേശസ്നേഹപരമായി ആഘോഷിക്കുകയാണെന്ന് അദ്ദേഹം പറഞ്ഞു.
വിശാലവും ജനനിബിഢവുമായ നമ്മുടെ രാജ്യത്തെ ഭക്ഷ്യ സ്വയം പര്യാപ്തമാക്കി മാറ്റാൻ കഠിന പരിശ്രമം നടത്തുന്ന കർഷകരെ എല്ലാ ഭാരതീയരും അഭിവാദ്യം ചെയ്യണമെന്ന് രാഷ്ട്രപതി പറഞ്ഞു. പ്രകൃതി ക്ഷോഭങ്ങൾ, കൊവിഡ് പ്രതിസന്ധി, മറ്റനവധി തടസ്സങ്ങൾ തുടങ്ങിയവ തർണം ചെയ്ത് നമ്മുടെ കർഷകർ നമ്മുടെ കാർഷികോത്പാദനം സ്ഥായിയായി നിലനിർത്തിയെന്നും അദ്ദേഹം പറഞ്ഞു. നമ്മുടെ രാജ്യം കർഷക ക്ഷേമത്തിന് ഊന്നൽ കൊടുക്കുന്നതാണെന്നും അദ്ദേഹം വ്യക്തമാക്കി.
രാജ്യത്തിന്റെ സുരക്ഷയ്ക്കും പരമാധികാരത്തിനും ഭീഷണി ഉയർത്തുന്ന ശത്രുവിന്റെ ഏതൊരു നീക്കത്തെയും പരാജയപ്പെടുത്താൻ നമ്മുടെ സൈന്യത്തിന് ശേഷിയുണ്ട്. സമധാനമാണ് നമ്മുടെ നയം എന്നതിനെ വിലകുറച്ച് കാണരുതെന്നും അദ്ദേഹം ഓർമ്മിപ്പിച്ചു.
രാജ്യവ്യാപകമായി നടക്കുന്ന കൊവിഡ് വാക്സിൻ വിതരണ പരിപാടിയിൽ എല്ലാവരും ഭാഗമാകണമെന്നും രാഷ്ട്രപതി ആഹ്വാനം ചെയ്തു. ഭരണകൂടവും ആരോഗ്യ വകുപ്പും ഈ പ്രക്രിയയെ ഒരു വൻ വിജയമാക്കി മാറ്റാൻ കഠിനമായി പരിശ്രമിക്കുകയാണെന്നും അദ്ദേഹം ചൂണ്ടിക്കാട്ടി.
Discussion about this post