ഹൈദരാബാദ്: നാലംഗ സംഘം തട്ടിക്കൊണ്ടുപോയി പീഡിപ്പിച്ചെന്ന ഫാര്മസി വിദ്യാര്ഥിനിയുടെ ആരോപണം തെറ്റെന്ന് തെളിയിച്ച് പൊലീസ്. തെലങ്കാനയിലാണ് സംഭവം. കുടുംബപ്രശ്നത്തെ തുടര്ന്ന് അമ്മയെ ഭയപ്പെടുത്താനാണ് പെണ്കുട്ടി കള്ളക്കഥ മെനഞ്ഞതെന്നാണ് പൊലീസ് കണ്ടെത്തിയിരിക്കുന്നത്. തന്നെ നാലംഗ സംഘം തട്ടിക്കൊണ്ടുപോയി പീഡിപ്പിച്ചു എന്നായിരുന്നു പെണ്കുട്ടി ആദ്യം പറഞ്ഞത്. ഈ കഥ വ്യാജമാണെന്ന് പൊലീസ് കണ്ടെത്തി.
ഫെബ്രുവരി പത്തിനാണ് കേസിനാസ്പദമായ സംഭവം നടന്നത്. ബി.ഫാം വിദ്യാര്ത്ഥിനിയെ നാലംഗ സംഘം തട്ടിക്കൊണ്ടുപോയെന്നും ഒന്നര മണിക്കൂറിനുള്ളില് വിദ്യാര്ത്ഥിനിയെ രക്ഷപ്പെടുത്തിയെന്നും പൊലീസ് മാധ്യമങ്ങളോട് പറഞ്ഞിരുന്നു. എന്നാല് പിന്നീട് പൊലീസ് നടത്തിയ വിശദമായ അന്വേഷണത്തില് പെണ്കുട്ടി പറഞ്ഞതെല്ലാം കള്ളമാണെന്ന് തെളിയുകയായിരുന്നു. സംഭവത്തില് പൊലീസ് വിശദമായ അന്വേഷണം ആരംഭിക്കുകയും ചെയ്തു.
ഓട്ടോ ഡ്രൈവര്മാരെ കേന്ദ്രീകരിച്ചായിരുന്നു പൊലീസ് സംഘം ആദ്യം അന്വേഷണം നടത്തിയത്. എന്നാല് കേസില് പെണ്കുട്ടിയുടെ വാദങ്ങള് പൊളിച്ചുകൊണ്ട് നിര്ണായക തെളിവായത് സി സി ടി വി ദൃശ്യങ്ങളാണ്. പെണ്കുട്ടി തട്ടിക്കൊണ്ടുപോയെന്ന് പറഞ്ഞ സമയം ഇവര് നഗരത്തിലെ മറ്റൊരിടത്തുകൂടി നടന്നുപോകുന്ന സി സി ടി വി ദൃശ്യങ്ങള് പൊലീസിന് ലഭിച്ചതോടെയാണ് 19കാരിയുടെ പീഡന കഥ പൊളിഞ്ഞത്.
ഗട്ട്കേസറിലെ കോളേജില്നിന്ന് വീട്ടിലേക്ക് മടങ്ങുന്ന വഴി ഓട്ടോ ഡ്രൈവറും മറ്റുമൂന്നുപേരും തട്ടിക്കൊണ്ടുപോയി പീഡിപ്പിച്ചെന്നായിരുന്നു 19കാരിയായ യുവതി ആദ്യം പറഞ്ഞിരുന്നത്. കൂടാതെ തന്നെ തട്ടിക്കൊണ്ടുപോയതായി പെണ്കുട്ടി തന്നെയാണ് വീട്ടുകാരെ വിളിച്ചറിയിച്ചത്. വീട്ടുകാര് പൊലീസിന്റെ സഹായത്തോടെ നടത്തിയ അന്വേഷണത്തില് തലയ്ക്ക് മുറിവേറ്റ്, വസ്ത്രം കീറിയ നിലയില് ആളൊഴിഞ്ഞ സ്ഥലത്തുനിന്ന് പെണ്കുട്ടിയെ കണ്ടെത്തുകയായിരുന്നു.
ഉടന്തന്നെ പെണ്കുട്ടിയെ ആശുപത്രിയില് പ്രവേശിപ്പിച്ചു. എന്നാല് ആശുപത്രിയില് നടത്തിയ പരിശോധനയില് പെണ്കുട്ടി പീഡിപ്പിക്കപ്പെട്ടിട്ടില്ലെന്ന് വ്യക്തമായി.തുടര്ന്ന് പെണ്കുട്ടിയെ വിശദമായി ചോദ്യം ചെയ്തതോടെ തട്ടിക്കൊണ്ടുപോകല് കള്ളക്കഥയാണെന്ന് അവര് തന്നെ സമ്മതിക്കുകയായിരുന്നു. കോളേജില് പോകാന് ഇറങ്ങുമ്പോള് വീട്ടില് നിന്ന് വഴക്കുണ്ടാക്കിയാണ് പെണ്കുട്ടി തിരിച്ചത്.
ഇതേത്തുടര്ന്ന് വീട്ടുകാരെ ഭയപ്പെടുത്താന് തീരുമാനിച്ച പെണ്കുട്ടി, തട്ടിക്കൊണ്ടുപോകലും, പീഡനവും നടന്നെന്ന കഥ മെനയുകയായിരുന്നു. വൈകിട്ട് കോളേജില്നിന്ന് വരുന്ന വഴി ആളൊഴിഞ്ഞ സ്ഥലത്ത് എത്തിയപ്പോള് വസ്ത്രങ്ങള് വലിച്ചു കീറുകയും സ്വയം മുറിവേല്പ്പിക്കുകയുമായിരുന്നു. അതിനുശേഷമാണ് തന്നെ തട്ടിക്കൊണ്ടു പോയതായി വീട്ടുകാരെ പെണ്കുട്ടി തന്നെ വിളിച്ച് അറിയിച്ചത്. പെണ്കുട്ടിയുടെ തലയില് ആഴത്തിലുള്ള മുറിവ് ഉണ്ട്. ഇതേത്തുടര്ന്ന് ഇവരെ ആശുപത്രിയില് പ്രവേശിപ്പിച്ചിരിക്കുകയാണ്.
Discussion about this post