ഡൽഹി: അയോധ്യയിലെ ശ്രീരാമ ക്ഷേത്ര നിർമ്മാണം പൂർത്തിയായാൽ ഡൽഹിയിലെ മുതിർന്ന പൗരന്മാരെ ദർശനത്തിന് കൊണ്ടു പോകുമെന്ന് ഡൽഹി മുഖ്യമന്ത്രി അരവിന്ദ് കെജരിവാൾ. അയോധ്യ ഭരിച്ചിരുന്ന ഭഗവാൻ ശ്രീരാമന്റെ ആദർശങ്ങളാണ് ഡൽഹി ഭരിക്കുമ്പോൾ താൻ പിന്തുടരുന്നതെന്നും കെജരിവാൾ പറഞ്ഞു. ഡൽഹി നിയമസഭയുടെ ബജറ്റ് സമ്മേളനത്തിൽ സംസാരിക്കുകയായിരുന്നു അദ്ദേഹം.
താൻ ഹനുമാൻ സ്വാമിയുടെ ഭക്തനാണെന്നും കെജരിവാൾ നിയമസഭയിൽ പറഞ്ഞു. രാമരാജ്യം എന്ന ആശയം മഹത്തരമാണെന്നും താൻ അതിന്റെ ആരാധകനാണെന്നും അദ്ദേഹം വ്യക്തമാക്കി.
‘ഭഗവാൻ ശ്രീരാമന്റെ ഭക്തനായ ഹനുമാൻ സ്വാമിയുടെ ആരാധകനാണ് ഞാൻ. അങ്ങനെ നോക്കുമ്പോൾ ഞാൻ ഇരുവരുടെയും ആരാധകനാണ്. ശ്രീരാമദേവൻ അയോധ്യയിലെ രാജാവായിരുന്നു. അദ്ദേഹത്തിന്റെ ഭരണകാലത്ത് എല്ലാ കാര്യങ്ങളും നന്നായി നടന്നിരുന്നു. എവിടെയും ദുഖം ഇല്ലായിരുന്നു. എല്ലാ സുഖസൗകര്യങ്ങളും ഉണ്ടായിരുന്നു. ഇതാണ് രാമരാജ്യം എന്ന ആശയം‘. കെജരിവാൾ നിയമസഭയിൽ പറഞ്ഞു.
രാജ്യഭരണത്തിന് ശ്രീരാമ ദേവൻ സ്വീകരിച്ചിരുന്ന തത്വങ്ങൾ മഹത്തരമായിരുന്നു. ഭക്ഷണം, വിദ്യാഭ്യാസം, ആരോഗ്യ പരിപാലനം, തൊഴിൽ, ഭവനങ്ങൾ, സ്ത്രീ സുരക്ഷ, മുതിർന്നവരോട് ആദരവ് എന്നിവ ശ്രീരാമ ഭഗവാൻ ഉറപ്പ് വരുത്തിയിരുന്നു. അത് ഏതൊരു കാലത്തും ഏതൊരു ഭരണാധികാരിക്കും അനുകരണീയമാണെന്നും കെജരിവാൾ അഭിപ്രായപ്പെട്ടു.
