കൽപറ്റ/ കോഴിക്കോട്: വയനാട്ടില് രണ്ടു നഗരസഭാ പരിധികളുള്പ്പെടെ 10 തദ്ദേശസ്ഥാപനങ്ങളില് ഏപ്രില് 30 വരെ നിരോധനാജ്ഞ പ്രഖ്യാപിച്ചു. കല്പറ്റ, ബത്തേരി നഗരസഭകളിലും കണിയാമ്പറ്റ, തിരുനെല്ലി, നെന്മേനി, അമ്പലവയൽ, തരിയോട്, പൊഴുതന, വെങ്ങപ്പള്ളി, മേപ്പാടി പഞ്ചായത്തുകളിലുമാണു കോവിഡ് പ്രതിരോധത്തിന്റെ ഭാഗമായി കലക്ടർ 144 പ്രഖ്യാപിച്ചത്.
കോഴിക്കോട് ജില്ലയിൽ നിലവിൽ 32 തദ്ദേശസ്ഥാപനങ്ങളിലായി 108 വാർഡുകളാണ് കണ്ടെയ്ൻമെന്റ് സോണുകളായിട്ടുള്ളത്. രോഗവ്യാപനം രൂക്ഷമാവുന്നതൊഴിവാക്കാന് പുറപ്പെടുവിച്ച കോവിഡ് നിയന്ത്രണങ്ങള് കര്ശനമായി പാലിക്കപ്പെടാത്ത സാഹചര്യത്തിൽ എല്ലാ കണ്ടെയ്ൻമെന്റ് സോണുകളിലും കലക്ടർ 144 പ്രഖ്യാപിച്ചു. കണ്ടെയ്ൻമെന്റ് സോണുകളിൽ പൊതുസ്വകാര്യ ഇടങ്ങളിലുള്ള കൂടിച്ചേരലുകള് ഇതുപ്രകാരം പൂര്ണമായി നിരോധിച്ചു.
തൊഴിലിനും, അവശ്യസേവനാവശ്യങ്ങള്ക്കും മാത്രമാണ് ഇളവ് അനുവദിച്ചിട്ടുള്ളത്. നിയന്ത്രണങ്ങള് ലംഘിക്കുന്നവര്ക്കെതിരേ കര്ശന ശിക്ഷാനടപടികള് സ്വീകരിക്കാന് പൊലീസ് മേധാവികള്ക്ക് കലക്ടര് നിര്ദേശം നല്കിയിട്ടുണ്ട്. കണ്ടയ്ന്മെന്റ് സോണുകളിലെ ആരാധനാലയങ്ങളില് അനുഷ്ഠാനങ്ങളും ചടങ്ങുകളും നടത്താനേ പാടുള്ളൂവെന്നും, അഞ്ചില് കൂടുതല് പേര് ഇതില് പങ്കെടുക്കരുതെന്നും നിർദ്ദേശമുണ്ട്.
