ഡല്‍ഹി: കൊവിഡ് വ്യാപനം നിയന്ത്രണവിധേയമാക്കാന്‍ സഹായഹസ്‌തവുമായി കരസേനയും രംഗത്ത്. രാജ്യത്തിന്റെ വിവിധ ഭാഗങ്ങളില്‍ താത്ക്കാലിക ആശുപത്രികള്‍ തുടങ്ങാന്‍ കരസേന തീരുമാനിച്ചു. സൈനിക ആശുപത്രികളില്‍ സാധാരണക്കാര്‍ക്കും ചികിത്സ നല്‍കും. കരസേന മേധാവി എം എം നരവാനെ പ്രധാനമന്ത്രി നരേന്ദ്രമോദിയുമായി കൂടിക്കാഴ്‌ച നടത്തിയതിനെ തുടര്‍ന്നാണ് തീരുമാനം.
അതേസമയം രാജ്യത്ത് ഏതാനും ദിവസങ്ങളായി പ്രതിദിന രോഗികളുടെ എണ്ണം മൂന്ന് ലക്ഷത്തിന് മുകളിലാണ്. രോഗികള്‍ നിറഞ്ഞതിനാല്‍ ചികിത്സ കിട്ടാതെ ആശുപത്രി പരിസരത്ത് തടിച്ചുകൂടുന്നവരുടെ നിരവധി വാര്‍ത്തകളാണ് ദിനംപ്രതി പുറത്തുവരുന്നത്. ഓക്‌സിജന്‍ സിലിണ്ടറുമായി ചികിത്സയ്‌ക്ക് ഊഴം കാത്ത് നില്‍ക്കുന്ന രോഗികളുടെ ദയനീയ കാഴ്‌ചകളും വര്‍ദ്ധിക്കുകയാണ്.
അതിനിടെയാണ് ചികിത്സയ്‌ക്ക് താത്ക്കാലിക ആശുപത്രികള്‍ ഒരുക്കാന്‍ കരസേന മുന്നിട്ടിറങ്ങുന്നത്. ഇറക്കുമതി ചെയ്യുന്ന ഓക്‌സിജന്‍ ടാങ്കറുകള്‍, വാഹനങ്ങള്‍ എന്നിവ കൈകാര്യം ചെയ്യുന്നതിന് വൈദഗ്ദ്ധ്യം ആവശ്യമാണ്. ഇതിനാവശ്യമായ മനുഷ്യവിഭവശേഷി നല്‍കാനും കരസേന തീരുമാനിച്ചിട്ടുണ്ട്.
Discussion about this post