ഡൽഹി: വിജയം വരിക്കാനുള്ള ഇന്ത്യയുടെ ദൃഢനിശ്ചയം എക്കാലവും ശക്തമെന്ന് പ്രധാനമന്ത്രി നരേന്ദ്ര മോദി. പ്രതിമാസ റേഡിയോ പരിപാടിയായ മൻ കീ ബാത്തിന്റെ 77ആം അദ്ധ്യായത്തിൽ സംസാരിക്കുകയായിരുന്നു അദ്ദേഹം. രാജ്യം കൊവിഡ് വ്യാപനത്തിന്റെ രണ്ടാം തരംഗത്തോട് പൊരുതുമ്പോൾ ഈ വിജയവാഞ്ചയുടെ ചരിത്രം നമ്മൾ ഏവരും ഓർക്കണമെന്നും അദ്ദേഹം പറഞ്ഞു.
കഴിഞ്ഞ ഒരു മാസത്തിനിടെ രണ്ട് കൊടുങ്കാറ്റുകളെ അതിജീവിച്ച ജനങ്ങൾക്ക് പ്രധാനമന്ത്രി അഭിവാദ്യമർപ്പിച്ചു. രക്ഷാപ്രവർത്തനങ്ങളിലും ദുരിതാശ്വാസ പ്രവർത്തനങ്ങളിലും പങ്കാളികളായവരെ അദ്ദേഹം അഭിനന്ദിച്ചു.
കൊവിഡ് വ്യാപനത്തിന്റെ കാലങ്ങളിൽ ആധുനിക സാങ്കേതിക വിദ്യയുടെ സഹായത്തോടെ രോഗികൾക്ക് ടെലിമെഡിസിൻ ഉൾപ്പെടെയുള്ള സേവനം നൽകുന്ന ആരോഗ്യ പ്രവർത്തകരെയും ആശുപത്രികളെയും പ്രധാനമന്ത്രി നരേന്ദ്ര മോദി പ്രശംസിച്ചു. വാക്സിനേഷനുമായി ബന്ധപ്പെട്ട് കിംവദന്തികളിൽ വിശ്വസിക്കരുതെന്നും രോഗത്തിനെതിരെ പ്രതിരോധം തീർക്കാൻ ഏവരും തയ്യാറാകണമെന്നും അദ്ദേഹം ആഹ്വാനം ചെയ്തു.
