വാഷിംഗ്ട്ടൻ: ലോക പ്രശസ്ത അമേരിക്കൻ സ്റ്റണ്ട്മാനും ഡർട്ട് റേസറുമായ അലക്സ് ഹാർവിൽ(28) അപകടത്തിൽ മരിച്ചു. നീളംകൂടിയ മോട്ടോർ സൈക്കിൾ ജംപിൽ ലോക റെക്കോർഡിന് ശ്രമിക്കവേയാണ് അലക്സിന് അപകടം പറ്റിയത്.
ലോക റെക്കോർഡ് ജംപിനായി വാഷിംഗ്ടണിലെ മോസസ് ലേക്ക് എയർഷോയിൽ പരിശീലിക്കുന്നതിനിടെയായിരുന്നു അപകടം. ജംപിനായി തയ്യാറാക്കിയ റാമ്പിൽ നിന്ന് 351 അടി ദൂരത്തേക്ക് ബൈക്കിൽ കുതിച്ച അലക്സ് ഡെർട്ട് പിറ്റിൽ എത്തുന്നതിനുമുമ്പ് താഴെ വീഴുകയായിരുന്നു.
അപകടത്തിൽ പരിക്കേറ്റ സ്റ്റണ്ട്മാൻ മരിച്ചുവെന്ന് ഗ്രാൻറ് കൗണ്ടി ഓഫീസ് സ്ഥിരീകരിച്ചു. 2008 മാർച്ചിൽ ഓസ്ട്രേലിയൻ മോട്ടോർ ബൈക്ക് സ്റ്റണ്ട്മാൻ റോബി മാഡിസൻ സ്ഥാപിച്ച 351 അടി ജമ്പ് ആണ് നിലവിലെ ലോക റെക്കോർഡ്. ഇത് ഭേദിക്കാനായിരുന്നു അലക്സിന്റെ ശ്രമം.
അലക്സിന്റെ മരണത്തെകുറിച്ച് ഞെട്ടലോടെയാണ് റോബി മാഡിസൺ പ്രതികരിച്ചത്. അലക്സിന്റെ അവസാന ജമ്പിന്റെ ചിത്രവും അദ്ദേഹം ഇൻസ്റ്റഗ്രാമിൽ പങ്കുവച്ചിട്ടുണ്ട്.
2013 ൽ 297 അടിയിലധികം ദൂരത്തിൽ ഡർട്ട് പിറ്റിൽ കുതിച്ച് അലക്സ് ഹാർവിൽ റെക്കോർഡ് സൃഷ്ടിച്ചിരുന്നു. കുഞ്ഞായിരിക്കുമ്പോൾ മുതൽ മോട്ടോർ സൈക്കിളുകളോട് ഭ്രമമുള്ള ആളാണ് അലക്സെന്ന് അദ്ദേഹത്തിൻറ പിതാവ് പറഞ്ഞിരുന്നു. ജസീക്കയാണ് ഹാർവിലിന്റെ ഭാര്യ . അഞ്ചുവയസ്സുകാരൻ വില്ലിസ്, നവജാത ശിശുവായ വാട്സൺ റോബർട്ട് ഹാർവിൽ എന്നിവരാണ് മക്കൾ.
Discussion about this post