ഇന്ത്യൻ വ്യോമസേനയുടെ നേതൃത്വത്തിൽ സംഘടിപ്പിക്കുന്ന ഏറ്റവും വലിയ ബഹുരാഷ്ട്ര വ്യോമസേനാ അഭ്യാസമായ ‘തരംഗ് ശക്തി 2026’ രാജസ്ഥാനിലെ ജോധ്പൂർ എയർഫോഴ്സ് സ്റ്റേഷനിൽ പ്രൗഢഗംഭീരമായി ആരംഭിച്ചു. ഒക്ടോബർ 12 വരെ നീണ്ടുനിൽക്കുന്ന ഈ വമ്പൻ പോരാട്ട പരിശീലനത്തിൽ നാല്പതിലധികം രാജ്യങ്ങളാണ് പങ്കാളികളാകുന്നത്. അമേരിക്ക, ഫ്രാൻസ്, യുഎഇ, ഓസ്ട്രേലിയ, ജർമ്മനി, ബംഗ്ലാദേശ്, ശ്രീലങ്ക തുടങ്ങിയ പ്രമുഖ രാജ്യങ്ങൾ തങ്ങളുടെ അത്യാധുനിക യുദ്ധവിമാനങ്ങളുമായും സൈനിക ശേഷിയുമായും അഭ്യാസത്തിൽ നേരിട്ട് പങ്കെടുക്കുമ്പോൾ മുപ്പതിലേറെ രാജ്യങ്ങൾ നിരീക്ഷണ വിഭാഗമായും തരംഗ് ശക്തിയുടെ ഭാഗമാകുന്നുണ്ട്.
അമേരിക്കയുടെ അഞ്ചാം തലമുറ സ്റ്റെൽത്ത് യുദ്ധവിമാനമായ എഫ്-35 (F-35) ആദ്യമായി ഇന്ത്യയിൽ നടക്കുന്ന ഒരു സൈനിക അഭ്യാസത്തിൽ പങ്കെടുക്കുന്നുവെന്നതാണ് ഇത്തവണത്തെ പ്രധാന പ്രത്യേകത. ഇതിനുപുറമെ ഫ്രാൻസിന്റെ റഫാൽ വിമാനങ്ങൾ, യുഎഇയുടെ എഫ്-16, ബംഗ്ലാദേശിന്റെ സി-130ജെ വിമാനങ്ങൾ എന്നിവയും വ്യോമപോരാട്ടത്തിൽ മാറ്റുരയ്ക്കാൻ എത്തിയിട്ടുണ്ട്. ഇന്ത്യയുടെ സ്വന്തം സുഖോയ്-30 എംകെഐ, റഫാൽ, തദ്ദേശീയമായി നിർമ്മിച്ച തേജസ്, മിറാഷ്-2000, മിഗ്-29 എന്നീ മുൻനിര യുദ്ധവിമാനങ്ങളും മിഡ്-എയർ റീഫ്യുവലിംഗ് ടാങ്കറുകളും അഭ്യാസത്തിൽ അണിനിരക്കുന്നുണ്ട്.
ഇന്ത്യൻ വ്യോമസേനയും സഖ്യരാജ്യങ്ങളും തമ്മിലുള്ള തന്ത്രപരമായ സഹകരണം വർദ്ധിപ്പിക്കാനും ഏറ്റവും പുതിയ സാങ്കേതികവിദ്യകളും യുദ്ധതന്ത്രങ്ങളും പങ്കുവെക്കാനുമാണ് ഈ ഭീമൻ അഭ്യാസത്തിലൂടെ ലക്ഷ്യമിടുന്നത്. പാകിസ്ഥാൻ അതിർത്തിക്ക് സമീപമുള്ള ജോധ്പൂർ, ജെയ്സാൽമർ മേഖലകളിലെ ആകാശത്ത് വൻതോതിലുള്ള വ്യോമ പോരാട്ടങ്ങളും ബോംബിംഗ് പരിശീലനങ്ങളും നടക്കും. ആഗോളതലത്തിൽ ഭാരതത്തിന്റെ പ്രതിരോധ ശേഷിയും തദ്ദേശീയ വ്യോമയാന കരുത്തും പ്രകടമാക്കുന്ന വലിയൊരു നാഴികക്കല്ലായാണ് തരംഗ് ശക്തി രണ്ടാം പതിപ്പിനെ ലോകരാജ്യങ്ങൾ നോക്കിക്കാണുന്നത്.
