ഇറാൻ മുന്നോട്ടുവെച്ച വെടിനിർത്തൽ നിർദ്ദേശം അമേരിക്കൻ പ്രസിഡന്റ് ഡൊണാൾഡ് ട്രംപ് തള്ളിക്കളഞ്ഞു. വരാനിരിക്കുന്ന അമേരിക്കൻ ഇടക്കാല തിരഞ്ഞെടുപ്പിന് ശേഷം ഇറാനെതിരെയുള്ള വ്യോമാക്രമണം പുനരാരംഭിക്കാൻ ട്രംപ് പദ്ധതിയിടുന്നതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. സാമ്പത്തിക ഉപരോധവും നാവിക ഉപരോധവും പിൻവലിച്ചാൽ ഹോർമുസ് കടലിടുക്ക് തുറന്നുനൽകാമെന്നും ആണവ ചർച്ചകൾ പുനരാരംഭിക്കാമെന്നുമുള്ള ഇറാന്റെ സമാധാന നിർദ്ദേശമാണ് ട്രംപ് നിരാകരിച്ചത്. ഇതോടെ പശ്ചിമേഷ്യൻ മേഖലയിൽ വീണ്ടും യുദ്ധഭീതി ശക്തമായിരിക്കുകയാണ്.
അമേരിക്കൻ ഉപരോധം നീക്കിയാൽ ഏഴ് ദിവസത്തിനുള്ളിൽ കടൽപ്പാത തുറക്കാമെന്ന് ഖത്തർ മുഖേന ഇറാൻ വിദേശകാര്യമന്ത്രി അബ്ബാസ് അരാഗ്ചി അറിയിച്ചിരുന്നു. എന്നാൽ ഇറാന്റെ ഉപാധികൾ അംഗീകരിക്കാൻ ട്രംപ് ഭരണകൂടം തയ്യാറല്ലെന്ന് വാഷിംഗ്ടൺ വ്യക്തമാക്കിയിട്ടുണ്ട്. ഇറാന്റെ സമ്പദ്വ്യവസ്ഥ തകർച്ചയിലാണെന്നും സൈനികവും സാമ്പത്തികവുമായ സമ്മർദ്ദം തുടർന്നാൽ മാത്രമേ അവർ പൂർണ്ണമായി വഴങ്ങുകയുള്ളൂവെന്നുമാണ് അമേരിക്കൻ ഉദ്യോഗസ്ഥരുടെ വിലയിരുത്തൽ. ഐക്യരാഷ്ട്രസഭയിൽ വെച്ച് ഇറാനെതിരെ കടുത്ത ഭാഷയിൽ സംസാരിച്ച ട്രംപ്, രാജ്യം ആണവായുധം നേടുന്നത് തടയുകയാണ് തന്റെ പ്രധാന ലക്ഷ്യമെന്ന് പ്രഖ്യാപിച്ചിരുന്നു.
തിരഞ്ഞെടുപ്പിന് ശേഷം വ്യോമാക്രമണം പുനരാരംഭിക്കാൻ ആലോചനയുണ്ടെങ്കിലും വലിയ രീതിയിലുള്ള നേരിട്ടുള്ള യുദ്ധത്തിലേക്ക് കടക്കാൻ അമേരിക്കയ്ക്ക് ചില തടസ്സങ്ങളുമുണ്ട്. പോരാട്ടത്തിന് ആവശ്യമായ ആയുധങ്ങളുടെയും വെടിയുണ്ടകളുടെയും ശേഖരത്തിൽ കുറവുണ്ടെന്ന റിപ്പോർട്ടുകൾ കാരണം തിരിച്ചടികൾ ഉണ്ടാകുമോ എന്ന ആശങ്ക സൈനിക കേന്ദ്രങ്ങൾക്കുണ്ട്. അതേസമയം, ഇരുരാജ്യങ്ങളും തമ്മിൽ മധ്യസ്ഥർ വഴി ചർച്ചകൾ തുടരുന്നുണ്ടെങ്കിലും കടൽമാർഗ്ഗമുള്ള ഉപരോധം മാറ്റില്ലെന്ന വാശിയിലാണ് യുഎസ്. വരുന്ന നവംബറിലെ ഇടക്കാല തിരഞ്ഞെടുപ്പിന് ശേഷം മേഖലയിലെ രാഷ്ട്രീയ, സൈനിക അന്തരീക്ഷം കൂടുതൽ കലുഷിതമാകാനാണ് സാധ്യത.
