ഡല്ഹി: കോവിഡ് വ്യാപനത്തിന്റെ പശ്ചാത്തലത്തില് പന്ത്രണ്ടാം ക്ലാസ് പരീക്ഷകള് റദ്ദാക്കിയ സിബിഎസ്ഇ, സിഐഎസ്ഇ ബോര്ഡുകളുടെ തീരുമാനം ഉചിതവും വിവേകപൂര്വമായ തീരുമാനമെന്ന് സുപ്രീം കോടതി. വിഷയത്തില് ഇടപെടില്ലെന്നു കോടതി വ്യക്തമാക്കി.
തീരുമാനത്തിനെതിരെ സമര്പ്പിക്കപ്പെട്ട ഹര്ജികള് ജസ്റ്റിസ് എ.എം. ഖാന്വില്കര്, ദിനേശ് മഹേശ്വരി എന്നിവരടങ്ങിയ അവധിക്കാല ബെഞ്ച് തള്ളി. 20 ലക്ഷം വിദ്യാര്ത്ഥികളുടെ ക്ഷേമം സംരക്ഷിക്കാനാണു തീരുമാനമെടുത്തതെന്നും സുപ്രീം കോടതി വ്യക്തമാക്കി.
‘തീരുമാനമെടുത്ത ബോര്ഡുകള് സ്വതന്ത്രമാണ്. വിദ്യാര്ത്ഥികളുടെ പൊതു താല്പര്യം പരിഗണിച്ചാണു പരീക്ഷകള് റദ്ദാക്കാനുള്ള തീരുമാനം അവര് എടുത്തത്’ സുപ്രീം കോടതി ഉത്തരവില് വ്യക്തമാക്കി.
സിബിഎസ്ഇ, ഐസിഎസ്ഇ ബോര്ഡുകളുടെ തീരുമാനത്തില് ഇടപെടാന് ഒരു കാരണവുമില്ല. തീരുമാനം ഉചിതവും വിവേകപൂര്വവുമാണ്. എല്ലാ വിദ്യാര്ത്ഥികളുടെയും ആശങ്കകളും ബോര്ഡുകള് പരിഗണിച്ചതായും സുപ്രീം കോടതി അറിയിച്ചു.
മറ്റു പരീക്ഷകള് നടക്കുന്നതുകൊണ്ടുതന്നെ 12-ാം ക്ലാസ് പരീക്ഷകള് റദ്ദാക്കുന്നതിന് ഒരു കാരണവുമില്ലെന്ന് കാണിച്ച് സ്വകാര്യ സ്കൂളിലെ ടീച്ചര് അന്ഷുല് ഗുപ്ത സുപ്രീം കോടതിയെ സമീപിച്ചിരുന്നു. ഐഐടി, എന്ഡിഎ തുടങ്ങി മറ്റു സ്ഥാപനങ്ങളുടെയെല്ലാം പരീക്ഷകള് നടക്കുന്നുണ്ടെന്നായിരുന്നു ഹര്ജിയിലെ വാദം.
അതേസമയം, ഈ പരീക്ഷകള്ക്കെത്തുന്ന വിദ്യാര്ത്ഥികളുടെയും പന്ത്രണ്ടാം ക്ലാസ് പരീക്ഷയെഴുതുന്ന വിദ്യാര്ത്ഥികളുടെയും എണ്ണം എത്രയാണെന്നും വിദ്യാര്ത്ഥികള്ക്കു കോവിഡ് ബാധയുണ്ടായാല് ഉത്തരവാദിത്തം ഏറ്റെടുക്കാന് തയാറാണോ എന്നും ഹര്ജിക്കാരോടു കോടതി ചോദിച്ചു.
Discussion about this post