ജമ്മു: എയര്‍ഫോഴ്‌സ് സ്‌റ്റേഷന് നേരെ ഡ്രോണ്‍ ഉപയോഗിച്ച്‌ ആക്രമണം നടത്തിയ ഭീകരര്‍ ലക്ഷ്യമിട്ടിരുന്നത് ജമ്മു എയര്‍പോര്‍ട്ടിലെ എയര്‍ട്രാഫിക് കണ്‍ട്രോള്‍ കെട്ടിടത്തിനെ. ടൈംസ് നൗ ചാനല്‍ നടത്തിയ അന്വേഷണത്തിലാണ് ഈ കണ്ടെത്തല്‍. ജമ്മു എയര്‍പോര്‍ട്ട് നടത്തിപ്പ് എയര്‍ ട്രാഫിക് കണ്‍ട്രോളും റണ്‍വെ വായുസേനയുടെ നിയന്ത്രണത്തിലുമാണ്.
ഭൂമിയില്‍ നിന്നും 1.2 കിലോമീ‌റ്റര്‍ മാത്രം ഉയരത്തിലാണ് ഡ്രോണ്‍ പറന്നത്. പ്രാഥമിക അന്വേഷണ വിവരം അനുസരിച്ച്‌ പാക് ഭീകര സംഘടനയായ ലഷ്‌കര്‍ ഇ തൊയ്‌ബയാണ് ആക്രമണത്തിന് പിന്നില്‍. ടി‌എന്‍‌ടി അടങ്ങിയ ആധുനിക സ്‌ഫോടനോപകരണങ്ങളാണ് ആക്രമണത്തിന് ഉപയോഗിച്ചത്.
ഭൂമിയുടെ അക്ഷാംശവും രേഖാംശവും കണക്കാക്കിയാണ് ആക്രമണം നടത്തിയത്.
എന്നാല്‍ ലക്ഷ്യം തെ‌റ്റി സേനയുടെ കെട്ടിടത്തില്‍ വന്നുവീഴുകയായിരുന്നു. വിമാനത്താവളത്തിലെ ടെക്‌നിക്കല്‍ ഏരിയയില്‍ ഒറ്റ‌നില കെട്ടിടത്തിന് മുകളിലാണ് ബോംബ് വന്ന് വീണത്. എന്നാല്‍ കെട്ടിടത്തിന് കാര്യമായ തകരാറൊന്നും സംഭവിച്ചില്ല.
വായുസേന മന്ദിരത്തിലേക്ക് നടത്തിയ ആക്രമണത്തെ കുറിച്ച്‌ അന്വേഷിക്കാന്‍ ദേശീയ അന്വേഷണ ഏജന്‍സിയെയാണ് ചുമതലപ്പെടുത്തുക. പ്രത്യേക ബോംബ് സ്‌ക്വാഡ് ടീമാണ് അന്വേഷിക്കുക. അതിര്‍ത്തിയ്‌ക്ക് അപ്പുറം നിന്നാണ് ഡ്രോണുകള്‍ നിയന്ത്രിച്ചതെന്ന് വ്യക്തമായിട്ടുണ്ട്. പ്രാദേശിക സഹായം ലഭിച്ചോ എന്നും അന്വേഷിക്കും.
ഇതാദ്യമായാണ് പാകിസ്ഥാന്‍ ഡ്രോണ്‍ ഉപയോഗിച്ച്‌ ഇന്ത്യന്‍ മണ്ണില്‍ ആക്രമണം നടത്തുന്നത്. ജമ്മുവിന് പുറമേ രത്നുചക്-കാലുചക് സൈനിക താവളത്തിലും സംശയാസ്‌പദമായ നിലയില്‍ രണ്ട് ഡ്രോണുകളെ കണ്ടെത്തിയിരുന്നു.
Discussion about this post