പുണെ: പെണ്മക്കളുണ്ടാകാത്തതിന്റെ പേരില് നാലുവര്ഷമായി ക്രൂരമായി മര്ദിക്കുകയും ആണ്കുഞ്ഞുണ്ടാകാനായി ദുര്മന്ത്രവാദത്തിന് ഇരയാക്കിയെന്നുമുള്ള യുവതിയുടെ പരാതിയില് ഭര്ത്താവും ഭര്തൃമാതാവും ആള്ദൈവവും അറസ്റ്റില്. പുണെ ജില്ലയില് 31കാരിയുടെ പരാതിയിലാണ് നടപടി. പെണ്മക്കളുണ്ടായതിന്റെ പേരില് യുവതിയെ ക്രൂരമായി മര്ദിച്ചു വരികയാണെന്നും പൊലീസ് പറയുന്നു.
ഖേദിലെ ഒരു ഗ്രാമത്തില് ഭര്ത്താവിനും കുടുംബത്തിനൊപ്പവുമായിരുന്നു യുവതിയുടെ താമസം. 2016ലായിരുന്നു ഇരുവരുടെയും വിവാഹം. 2017ല് ഇവര് ഒരു പെണ്കുഞ്ഞിന് ജന്മം നല്കി. ഇതോടെ മാനസികമായും ശാരീരികമായും ഭര്ത്താവും മാതാവും യുവതിയെ മര്ദിക്കാന് തുടങ്ങി. കൂടാതെ യുവതിയുടെ വയറില് ചവിട്ടുകയും വീട്ടിലേക്ക് ദൗര്ഭാഗ്യം കൊണ്ടുവന്നെന്ന് കുറ്റപ്പെടുത്തുകയും ചെയ്തിരുന്നു. യുവതിയുടെ വീട്ടില്നിന്ന് കൂടുതല് സ്വര്ണവും പണവും ആവശ്യപ്പെടുകയും ചെയ്തിരുന്നു.
2020ല് വീണ്ടും ഇവര്ക്ക് ഒരു പെണ്കുഞ്ഞ് ജനിച്ചു. ഇതോടെ യുവതിക്ക് നേരെ അതിക്രമങ്ങളും വര്ധിക്കുകയായിരുന്നു. കുട്ടികളെ കൊലപ്പെടുത്തുമെന്ന് ഭര്ത്താവ് ഭീഷണിപ്പെടുത്തുകയും ചെയ്തു. മര്ദനം തുടര്ന്നതോടെ യുവതി സ്വന്തം വീട്ടിലേക്ക് മടങ്ങി.
ആഗസ്റ്റ് മൂന്നാമത്തെ ആഴ്ചയില് ഭര്ത്താവെത്തി യുവതിയെയും മക്കളെയും പുണെയിലേക്ക് തിരിച്ചുകൊണ്ടുപോയി. എന്നാല്, അവിടെയെത്തിയ ശേഷം യുവതിയെ പ്രദേശത്തെ ആള്ദൈവമെന്ന് വിശേഷിപ്പിക്കുന്ന ആളുടെ അടുത്തെത്തിക്കുകയായിരുന്നു. ദമ്പതികള്ക്ക് അവിടെനിന്ന് ഭസ്മം നല്കി വിടുകയുംചെയ്തു. നഗ്ന ശരീരത്തില് ഭസ്മം പുരട്ടിയാല് ആണ്കുഞ്ഞ് ജനിക്കുമെന്നായിരുന്നു ആള്ദൈവത്തിന്റെ വാദം.
വീട്ടിലെത്തിയതോടെ ഭര്ത്താവും ബന്ധുക്കളും ചേര്ന്ന് യുവതിയെ നിര്ബന്ധമായി വസ്ത്രം അഴിപ്പിക്കുകയും ദേഹത്ത് ഭസ്മം പുരട്ടുകയും ചെയ്തതായി യുവതിയുടെ പരാതിയില് പറയുന്നു. തുടര്ന്ന് യുവതി പൊലീസില് പരാതി നല്കുകയായിരുന്നു. പരാതിയില് ഭര്ത്താവിനും ഭര്തൃമാതാവിനും ആള്ദൈവത്തിനുമെതിരെ പൊലീസ് കേസെടുത്തു.
Discussion about this post