ടോക്യോ: നാലു വര്ഷത്തെ കാത്തിരിപ്പിനൊടുവില് രാജകീയ പദവിയും സ്വത്തുക്കളും വേണ്ടെന്നു വച്ച് ജപ്പാനിലെ രാജകുമാരി മാക്കോ വിവാഹിതയായി. രാജകുടുംബത്തിനു പുറത്തുള്ള തന്റെ സുഹൃത്ത് കെയ് കൊമൂറോയെയാണ് മാക്കോ രാജകുമാരി വിവാഹം ചെയ്തത്. ഇന്ന് രാവിലെ പത്ത് മണിയോടെ പ്രാദേശിക രജിസ്ട്രേഷന് ഓഫീസില് വച്ചാണ് ഇരുവരും വിവാഹിതരായത്.
ജപ്പാനിലെ വിവാഹങ്ങളുടെ പതിവ് പ്രത്യേകതയായ ആഡംബര ചടങ്ങുകള് ഉപേക്ഷിച്ച് ലളിതമായ ചടങ്ങിലാണ് ഇരുവരും വിവാഹിതരായതെന്ന് ജപ്പാനിലെ ഒരു ന്യൂസ് ഏജന്സി റിപ്പോര്ട്ട് ചെയ്തു. ഇരുവരും കോളേജില് സഹപാഠികളായിരുന്നു. വിവാഹത്തോടെ രാജകീയ പദവികള് നഷ്ടമായ മാക്കോ, കൊമൂറോ ജോലി ചെയ്യുന്ന ന്യൂയോര്ക്കിലേക്ക് താമസം മാറുമെന്ന് കരുതുന്നു.
നാലു വര്ഷം മുമ്പാണ് മാക്കോയും കൊമൂറോയും തമ്മിലുള്ള വിവാഹം ഉറപ്പിച്ചത്. അന്നു മുതല് വിവാഹത്തെ ചൊല്ലി ജപ്പാനില് നിരവധി പ്രശ്നങ്ങള് ഉയര്ന്നിരുന്നു. പൊതുജനത്തിന്റെ ഇടയില് നിന്നും ഉയര്ന്ന എതിര്പ്പാണ് ഏറ്റവും വലിയ പ്രതിസന്ധി സൃഷ്ടിച്ചത്. ഇടഞ്ഞു നില്ക്കുന്ന ജനങ്ങളെ ശാന്തരാക്കുന്നതിന് വേണ്ടി തനിക്ക് നിയമപ്രകാരം അര്ഹതയുണ്ടായിരുന്ന ഒരു മില്ല്യണ് അമേരിക്കന് ഡോളര് (7.51 കോടി രൂപ) മാക്കോ വേണ്ടെന്ന് വച്ചിരുന്നു.
കൊമൂറോയുടെ അമ്മയുടെ പേരില് ഉയര്ന്നു വന്ന സാമ്പത്തില അഴിമതി ആരോപണമായിരുന്നു വിവാഹത്തിനുമേല് കരിനിഴല് വീഴ്ത്തിയ മറ്റൊരു സംഭവം. തന്റെ മുന് കാമുകനില് നിന്ന് കൊമൂറോയുടെ അമ്മ 36000 അമേരിക്കന് ഡോളര് കടം വാങ്ങിച്ചതിനു ശേഷം കബളിപ്പിച്ചുവെന്ന് ആരോപണം ഉണ്ടായിരുന്നു.
