ചെങ്ങന്നൂര്‍: ശബരിമല ദര്‍ശനത്തിനായി യുവതി ചെങ്ങന്നൂരിലെത്തി. ട്രെയിന്മാര്‍ഗമാണ് തമിഴ്‌നാടുസ്വദേശിനിയായ യുവതി ചെങ്ങന്നൂരിലെത്തിയതെന്നു സംശയിക്കുന്നു. തിങ്കളാഴ്ച രാത്രി ഒന്‍പതുമണിയോടെയാണു സംഭവം.
ചെങ്ങന്നൂരിലെത്തിയ യുവതിയെ അവിടെ വച്ചു തന്നെ ഭക്തര്‍ തടഞ്ഞു. ശബരിമലയ്ക്കുപോകണമെന്ന ആവശ്യത്തോടെ റെയില്‍വേ സ്റ്റേഷന്‍ പരിസരത്തെ പമ്പ ബസിനുള്ളില്‍ക്കയറി. പിന്നീട്, തീര്‍ത്ഥാടകരുടെ പ്രതിഷേധത്തത്തുടര്‍ന്ന് ഇവര്‍ ബസില്‍നിന്നിറങ്ങി. തുടര്‍ന്ന് ചെങ്ങന്നൂര്‍ പൊലീസെത്തി സംസാരിച്ചപ്പോള്‍ നാട്ടിലേക്കു മടങ്ങാമെന്നു യുവതി അറിയിച്ചു. യുവതിയെ പൊലീസ് കെ.എസ്.ആര്‍.ടി.സി. ബസ് സ്റ്റാന്‍ഡിലെത്തിച്ചു. തിരുവനന്തപുരം ബസില്‍ ഇവര്‍ കയറിപ്പോയതായി ദൃക്സാക്ഷികള്‍ പറയുന്നു.
കൊല്ലം സ്വദേശിനിയാണെന്നു പറഞ്ഞ യുവതി തമിഴും ഇംഗ്ലീഷും ഇടകലര്‍ത്തിയാണു സംസാരിച്ചിരുന്നത്. മാനസിക പ്രശ്‌നമുണ്ടെന്നു സംശയിക്കുന്നതായി പൊലീസ് പറഞ്ഞു. ശബരിമലയില്‍ ഓണ്‍ലൈന്‍ വഴി ബുക്കിങ് എടുത്താണ് ഇത്തവണ ദര്‍ശനം. പൊലീസിന്റെ കര്‍ശന നിരീക്ഷണവുമുണ്ട്. യുവതി പ്രവേശനത്തിന് ഉള്ള സുപ്രീംകോടതി അനുമതിക്ക് ഇപ്പോഴും സാധുതയുണ്ട്. ഈ വിഷയം ഭരണഘടനയുടെ വിശാല ബഞ്ച് പുനപരിശോധിക്കുമ്ബോഴും പഴയ വിധിക്ക് സ്റ്റേ ഇല്ല. അതുകൊണ്ട് തന്നെ ശബരിമല പ്രവേശനത്തിന് യുവതികളെത്തിയാല്‍ അവരെ തടയാന്‍ പൊലീസിന് കഴിയില്ല.
ഈ സാഹചര്യം മുതലെടുക്കാന്‍ ചിലര്‍ ശ്രമിക്കുമെന്ന സംശയമാണ് ചെങ്ങന്നൂരില്‍ ഉണ്ടാകുന്നത്. ഇന്നാണ് മണ്ഡലക്കാലം തുടങ്ങുന്നത്. നട തുറന്ന അന്നു തന്നെ യുവതി പ്രവേശന ലക്ഷ്യത്തോടെ എത്തുകയും ചെയ്തു. മണ്ഡല-മകരവിളക്ക് ഉല്‍സവത്തിനായി ശബരിമല നട ഇന്നലെ തുറന്നു. വ്യശ്ചികം ഒന്നായ ഇന്ന് പുലര്‍ച്ച മുതല്‍ ഭക്തരെ കടത്തിവിടാനും തുടങ്ങി.
മഴ വലിയ പ്രതിസന്ധിയാണ് ഇപ്പോള്‍. ശബരിമലയിലേക്കുള്ള പ്രധാന റോഡുകളില്‍ എല്ലാം വിവിധ ഭാഗങ്ങളില്‍ വെള്ളകെട്ടുണ്ട്. വൈകിട്ട് അഞ്ചിന് ക്ഷേത്രം തന്ത്രി കണ്ഠരര് മഹേഷ് മോഹനരുടെ മുഖ്യ കാര്‍മികത്വത്തില്‍ മേല്‍ശാന്തി വി.കെ.ജയരാജ് പോറ്റി നട തുറന്ന് ദീപം തെളിച്ചു. പതിവ് പൂജകള്‍ക്ക് ശേഷം പുതിയ ശബരിമല മാളികപ്പുറം മേല്‍ശാന്തിമാര്‍ ചുമതല ഏറ്റു. കാലവസ്ഥ പ്രതികൂലമായതിനാല്‍ ആദ്യ മുന്ന് ദിവസം ചില നിയന്ത്രണങ്ങളുണ്ട്. ബുക്ക് ചെയ്ത ഭക്തര്‍ക്ക് ഈ ദിവസങ്ങളില്‍ എത്താന്‍ കഴിഞ്ഞില്ലെങ്കില്‍ മറ്റൊരു ദിവസം സൗകര്യം ഒരുക്കും.
സ്്‌പോട്ട് ബുക്കിങ് ഉണ്ടായിരിക്കില്ല. ശക്തമായ ഒഴുക്കായതിനാല്‍ പമ്പ സ്‌നാനത്തിനും അനുമതിയില്ല. വെള്ളം കയറിയത് മൂലം പുനലൂര്‍ – മൂവാറ്റുപുഴ, പന്തളം – പത്തനംതിട്ട റോഡുകളില്‍ ഗതാഗതതടസപ്പെട്ടു. മൂന്നു തവണ ലേലം നടത്തിയെങ്കിലും സന്നിധാനം, പമ്പ, നിലയ്ക്കല്‍ എന്നിവടങ്ങളിലെ ഭൂരിഭാഗം കടകളും ആരും ഏറ്റെടുത്തിട്ടില്ല. സന്നിധാനത്ത് നിലവില്‍ ഒരു ഹോട്ടല്‍ മാത്രമാണുള്ളത്.
Discussion about this post