കൊവിഡ് കാലത്ത് അടഞ്ഞു കിടന്ന തിയേറ്ററുകൾ വീണ്ടും തുറന്നതോടെ മലയാള സിനിമാ ലോകം ആവേശത്തിൽ. ഏറെ കാത്തിരിപ്പിന് ശേഷം എത്തിയ ദുൽഖർ സൽമാൻ ചിത്രം കുറുപ്പ് തിയേറ്ററുകളിൽ ആവേശം നിറച്ച് മുന്നേറുമ്പോൾ റിലീസിന് തയ്യാറെടുക്കുകയാണ് ആരാധകർ നാളുകളായി കാത്തിരിക്കുന്ന സുരേഷ് ഗോപി ചിത്രം കാവലും മോഹൻലാൽ ചിത്രം മരക്കാറും.
കാവലിന്റെ റിലീസ് ഈ മാസം 25ന് തന്നെ ഉണ്ടാകുമെന്ന് നിർമ്മാതാവ് ജോബി ജോർജ്ജ് വ്യക്തമാക്കി. കാവലിലെ സുരേഷ് ഗോപിയുടെ ഒരു പോസ്റ്റര് കഴിഞ്ഞ ദിവസം അദ്ദേഹം ഫേസ്ബുക്കില് പോസ്റ്റ് ചെയ്തിരുന്നു. സുരേഷ് ഗോപി ആരാധകരില് വലിയ കാത്തിരിപ്പ് ഉയര്ത്തിയിരിക്കുന്ന ചിത്രമാണ് കാവല്. പഞ്ച് ഡയലോഗുകളും മാസ് രംഗങ്ങളുമുള്ള നായകനായാണ് സുരേഷ് ഗോപി എത്തുന്നത്. ‘തമ്പാന്’ എന്നാണ് സുരേഷ് ഗോപി അവതരിപ്പിക്കുന്ന കഥാപാത്രത്തിന്റെ പേര്. ഹൈറേഞ്ചിന്റെ പശ്ചാത്തലത്തിൽ രണ്ടു കാലഘട്ടത്തിന്റെ കഥ പറയുന്ന ചിത്രമാണിത്.
ആക്ഷൻ ഫാമിലി ഡ്രാമ വിഭാഗത്തില് പെടുന്ന ചിത്രത്തിന്റെ നിര്മ്മാണം ഗുഡ്വിൽ എന്റര്ടെയ്ന്മെന്റ്സിന്റെ ബാനറിൽ ജോബി ജോർജ് ആണ്. നിതിൻ രൺജി പണിക്കർ സംവിധാനം ചെയ്യുന്ന ചിത്രത്തിൽ രണ്ജി പണിക്കരാണ് മറ്റൊരു പ്രധാന കഥാപാത്രത്തെ അവതരിപ്പിച്ചിരിക്കുന്നത്. ശങ്കര് രാമകൃഷ്ണന്, സുരേഷ് കൃഷ്ണ, പത്മരാജ് രതീഷ്, ശ്രീജിത്ത് രവി, സാദ്ദിഖ്, രാജേഷ് ശർമ്മ, സന്തോഷ് കീഴാറ്റൂർ, കിച്ചു ടെല്ലസ്, ബിനു പപ്പു, രാജേഷ് ശര്മ്മ, കണ്ണൻ രാജൻ പി ദേവ്, ചാലി പാല, അരിസ്റ്റോ സുരേഷ്, ഇവാന് അനില്, റേയ്ച്ചല് ഡേവിഡ്, മുത്തുമണി, അഞ്ജലി നായര്, അനിത നായർ, പൗളി വത്സന്, അംബിക മോഹന്, ശാന്ത കുമാരി, ബേബി പാർവ്വതി തുടങ്ങിയവരും ചിത്രത്തിൽ അണിനിരക്കുന്നു.
പ്രിയദർശൻ സംവിധാനം ചെയ്ത ബ്രഹ്മാണ്ഡ മോഹൻലാൽ ചിത്രമാണ് മരക്കാർ: അറബിക്കടലിന്റെ സിംഹം. ഡിസംബർ രണ്ടിന് ആണ് ചിത്രം റിലീസ് ചെയ്യുക. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് ചിത്രത്തിന്റെ നിർമ്മാണം. അഞ്ച് ഭാഷകളിലായാണ് ചിത്രം പ്രദർശനത്തിനെത്തുന്നത്. സാമൂതിരി രാജവംശത്തിന്റെ നാവികമേധാവിയായിരുന്ന കുഞ്ഞാലി മരക്കാറുടെ കഥയാണ് ചിത്രം പറയുന്നത്. മോഹന്ലാല് ടൈറ്റില് റോളിലെത്തുന്ന ചിത്രത്തില് മോഹന്ലാലിന്റെ കുട്ടിക്കാലം അവതരിപ്പിക്കുന്നത് പ്രണവ് മോഹന്ലാല് ആണ്.
മഞ്ജു വാര്യരാണ് നായികയായി എത്തുന്നത്. കീര്ത്തി സുരേഷ്, കല്യാണി പ്രിയദര്ശന്, ബോളിവുഡ് താരം സുനില് ഷെട്ടി, സംവിധായകന് ഫാസില്, സിദ്ദിഖ്, മുകേഷ്, നെടുമുടി വേണു, പ്രഭു, അശോക് സെല്വന്, അര്ജുന് സര്ജ എന്നിങ്ങനെ വമ്പന് താരനിരയാണ് ചിത്രത്തില് അണിനിരക്കുന്നത്. ചിത്രം ഇതിനോടകം തന്നെ ദേശീയ- അന്തർദേശീയ ശ്രദ്ധ ആകർഷിച്ചു കഴിഞ്ഞു.
വർഷങ്ങൾക്ക് ശേഷമാണ് രണ്ട് മാസ് ചിത്രങ്ങളുമായി മോഹൻലാലും സുരേഷ് ഗോപിയും പ്രേക്ഷകർക്ക് മുന്നിൽ എത്തുന്നത്. ഇതിന്റെ ആവേശത്തിലാണ് ഇരു താരങ്ങളുടെയും ആരാധകർ. സാമൂഹിക മാധ്യമങ്ങളിൽ പരസ്പരം വിജയാശംസകൾ നേർന്ന് ആവേശത്തോടെ തങ്ങളുടെ പ്രിയ താരങ്ങളെ വെള്ളിത്തിരയിൽ കണ്ട് ആർപ്പു വിളിക്കാൻ കാത്തിരിക്കുകയാണ് ഇവർ.
Discussion about this post