ഇന്ത്യക്കാര്‍ ഏറ്റവുമധികം തിരഞ്ഞ വ്യക്തി പ്രധാനമന്ത്രി നരേന്ദ്ര മോദിയെന്ന് കണക്കുകള്‍ പുറത്തുവിട്ട് യാഹു. 2021 ലെ റിവ്യൂ റിപ്പോര്‍ട്ടാണ് യാഹു പുറത്തുവിട്ടത്. ഏറ്റവുമധികം പേര്‍ തിരഞ്ഞ രണ്ടാമത്തെ വ്യക്തി ക്രിക്കറ്റ് താരം വിരാട് കോഹ്ലിയാണ്.
2017 ല്‍ മുതല്‍ യാഹുവിന്റെ ഏറ്റവുമധികം സേര്‍ച്ച്‌ ചെയ്യപ്പെട്ട വ്യക്തികളുടെ പട്ടികയില്‍ പ്രധാനമന്ത്രി ഇടം പിടിക്കുന്നുണ്ട്. കഴിഞ്ഞ വര്‍ഷം മാത്രമാണ് അദ്ദേഹം പിന്നോട്ട് പോയത്. ആത്മഹത്യ ചെയ്ത ബോളിവുഡ് നടന്‍ സുശാന്ത് സിംഗ് രജപുത്താണ് കഴിഞ്ഞ വര്‍ഷം ഒന്നാം സ്ഥാനത്തെത്തിയത്.
അതേസമയം ആഢംബര കപ്പലിലെ ലഹരിമരുന്ന് കേസില്‍ അറസ്റ്റിലായ ബോളിവുഡ് നടന്‍ ഷാരൂഖ് ഖാന്റെ മകന്‍ ആര്യന്‍ ഖാന്‍ കൂടുതല്‍ സേര്‍ച്ച്‌ ചെയ്യപ്പെട്ട വ്യക്തികളുടെ പട്ടികയില്‍ ഇടം നേടി. ഏഴാം സ്ഥാനത്താണ് ആര്യന്‍ ഖാനുള്ളത്. ഏറ്റവും കൂടുതല്‍ തിരഞ്ഞ സെലിബ്രിറ്റി ബിഗ് ബോസ് താരം സിദ്ധാര്‍ത്ഥ് ശുക്ലയാണ്. അദ്ദേഹത്തിന്റെ മരണത്തില്‍ അനുശോചിച്ചുകൊണ്ട് നിരവധി പേരാണ് രംഗത്തെത്തിയത്.
കേന്ദ്ര ആഭ്യന്തര മന്ത്രി അമിത് ഷായും ഡല്‍ഹി മുഖ്യമന്ത്രി അരവിന്ദ് കെജ്രിവാളും ആദ്യ അഞ്ച് സ്ഥാനങ്ങളിലെത്തിയിട്ടുണ്ട്.
Discussion about this post