എലിസബത്ത് രാജ്ഞിക്ക് കൊവിഡ്; ആയുരാരോഗ്യ സൗഖ്യം നേർന്ന് പ്രധാനമന്ത്രി നരേന്ദ്ര മോദി

ഡൽഹി: എലിസബത്ത് രാജ്ഞിക്ക് കൊവിഡ് സ്ഥിരീകരിച്ചു. 95 വയസ്സുകാരിയായ രാജ്ഞി നിലവിൽ വിൻഡ്സർ കൊട്ടാരത്തിൽ വിശ്രമത്തിലാണ്. കുറച്ച് ദിവസത്തേക്ക് രാജ്ഞി ഔദ്യോഗിക കാര്യങ്ങളിൽ നിന്നും വിട്ട് നിൽക്കുമെന്ന് ബക്കിംഗ്ഹാം കൊട്ടാരം അറിയിച്ചു.

I wish Her Majesty Queen Elizabeth a speedy recovery and pray for her good health. https://t.co/Em873ikLl8

— Narendra Modi (@narendramodi) February 20, 2022

എലിസബത്ത് രാജ്ഞിക്ക് ആയുരാരോഗ്യ സൗഖ്യങ്ങൾ നേരുന്നതായി പ്രധാനമന്ത്രി നരേന്ദ്ര മോദി ട്വീറ്റ് ചെയ്തു. അവർ എത്രയും വേഗം രോഗമുക്തയാകാൻ പ്രാർത്ഥിക്കുന്നതായും അദ്ദേഹം അറിയിച്ചു.

നിലവിൽ രാജ്ഞിക്ക് നേരിയ രോഗലക്ഷണങ്ങൾ മാത്രമാണ് ഉള്ളതെന്നാണ് റിപ്പോർട്ട്. ഡോക്ടർമാരുടെ നിർദ്ദേശ പ്രകാരം ചികിത്സ നടക്കുകയാണെന്നും കൊവിഡ് മാനദണ്ഡ പ്രകാരം രാജ്ഞി നിരീക്ഷണത്തിലാണെന്നും ബക്കിംഗ്ഹാം കൊട്ടാരം ഔദ്യോഗിക വാർത്താ കുറിപ്പിൽ അറിയിച്ചു.

നേരത്തെ എലിസബത്ത് രാജ്ഞിയുടെ 73 വയസ്സുകാരനായ മകൻ ചാൾസ് രാജകുമാരന് രണ്ടാം തവണയും കൊവിഡ് സ്ഥിരീകരിച്ചിരുന്നു.വിൻഡ്സർ കൊട്ടാരത്തിലെ ജീവനക്കാർക്കും രോഗബാധ സ്ഥിരീകരിച്ചു. ഇവരും ചികിത്സയിലാണ്.