ലഖ്നൗ: ട്യൂഷന് പോയ പെൺകുട്ടിയെ അയൽ സംസ്ഥാനത്തേക്ക് കടത്തിക്കൊണ്ട് പോയ കേസിൽ മദ്രസ അധ്യാപകൻ അറസ്റ്റിൽ. ഉത്തർ പ്രദേശ് സ്വദേശി നൂർഹസനാണ് അറസ്റ്റിലായത്. ട്യൂഷന് പോകുന്നതിനിടെ കുട്ടിയെ ബലമായി ഇയാൾ പിടിച്ചുകൊണ്ട് പോകുകയായിരുന്നു.
കഴിഞ്ഞ മാസമാണ് നൂർഹസൻ പെൺകുട്ടിയെ തട്ടിക്കൊണ്ട് പോയത്. രാത്രി വൈകിയും കുട്ടി വീട്ടിലെത്താത്തതിനെ തുടർന്ന് വീട്ടുകാർ പോലീസിൽ പരാതി നൽകി. ഇതേ തുടർന്ന് നടത്തിയ അന്വേഷണത്തിൽ നൂർഹസൻ പെൺകുട്ടിയെ തട്ടിക്കൊണ്ടു പോയതായി വ്യക്തമാകുകയായിരുന്നു. തുടർന്ന് വീട്ടുകാരും പോലീസും നൂർഹസന്റെ വീട്ടിലെത്തിയെങ്കിലും ഇരുവരെയും കണ്ടെത്താൻ കഴിഞ്ഞില്ല. നിരവധി തവണ ഫോണിൽ ബന്ധപ്പെടാൻ ശ്രമിച്ചെങ്കിലും സാധിച്ചിരുന്നില്ല.
ഇതിനിടെ പെൺകുട്ടി ഹരിയാനയിലെ ഗുരുഗ്രാമിൽ ഉള്ളതായി ചില ബന്ധുക്കൾ വീട്ടുകാരെ അറിയിക്കുകയായിരുന്നു. തുടർന്ന് പോലീസ് ഗുരുഗ്രാമിൽ എത്തി പെൺകുട്ടിയെ രക്ഷിക്കുകയായിരുന്നു. ഒപ്പമുണ്ടായിരുന്ന നൂർഹസനെ പൊലീസ് അറസ്റ്റ് ചെയ്തു.
