ബരാമുള്ള: കശ്മീരിൽ ഇന്ത്യൻ ആർമിയും നാട്ടുകാരുമായി സൗഹൃദ സ്നോ വോളിബോൾ മത്സരം സംഘടിപ്പിച്ചു. ഉറി സെക്ടറിന് സമീപമുള്ള സോംവാലി ഗ്രാമത്തിലായിരുന്നു മത്സരം.
നിയന്ത്രണ രേഖക്ക് സമീപമായതിനാൽ ഇവിടുത്തെ നാട്ടുകാർക്ക് കായിക വിനോദങ്ങളിലൊന്നും ഏർപ്പെടാൻ സാധിക്കുമായിരുന്നില്ല. ഈ സാഹചര്യത്തിൽ സൈനികരുമായി സൗഹൃദ മത്സരം കളിക്കാൻ സാധിച്ചത് മികച്ച അനുഭവമായി നാട്ടുകാർ പറയുന്നു. നാട്ടുകാരും സൈനികരും തമ്മിൽ ഇപ്പോൾ നല്ല ബന്ധമാണ് നിലനിൽക്കുന്നതെന്ന് അബ്ദുൾ റഷീദ് എന്ന നാട്ടുകാരൻ വാർത്താ ഏജൻസിയോട് പറഞ്ഞു.
സൗഹൃദ സ്നോ വോളിബോൾ മത്സരം വലിയ വിജയമായിരുന്നു. ഇനിയും പ്രദേശത്ത് ഇത്തരം മത്സരങ്ങൾ സംഘടിപ്പിക്കുമെന്ന് പഞ്ചായത്ത് അംഗം മുഹമ്മദ് യൂസഫ് പറഞ്ഞു.
കുട്ടികളും വൃദ്ധരുമടങ്ങുന്ന വലിയൊരു വിഭാഗം മത്സരം കാണാൻ എത്തിയിരുന്നു. സൈനികരുമായി സൗഹൃദം പങ്കിടാൻ കഴിഞ്ഞത് കുട്ടികൾക്ക് മികച്ച അനുഭവമായിരുന്നുവെന്നും മത്സരം ഗംഭീരമായിരുന്നുവെന്നും അധ്യാപികയായ യാസ്മീൻ അഭിപ്രായപ്പെട്ടു.
Discussion about this post