കൊഹിമ: നാഗാലാന്‍ഡില്‍ നിന്ന് ആദ്യമായി ഒരു വനിത ഇത്തവണ രാജ്യസഭയിലെത്തും. ബിജെപി നേതാവ് എസ് ഫാങ്‌നോണ്‍ കൊന്യാക് ആണ് ചരിത്രത്തിന്റെ ഭാഗമാകുന്നത്. മറ്റാരും പത്രിക നല്‍കാത്തതിനാല്‍ എതിരില്ലാതെയാണ് അവര്‍ തെരഞ്ഞെടുക്കപ്പെടുന്നത്.
1977-ല്‍ സ്വതന്ത്രയായി ലോക്‌സഭയിലേക്ക് തെരഞ്ഞെടുക്കപ്പെട്ട റാണോ എം ഷൈസയ്ക്ക് ശേഷം സംസ്ഥാനത്ത് നിന്നുള്ള രണ്ടാമത്തെ വനിതാ പാര്‍ലമെന്റേറിയന്‍ കൂടിയാണ് അവര്‍. നാഗാലാന്‍ഡില്‍ നിന്ന് പാര്‍ലമെന്റിലേക്ക് അയക്കപ്പെടുന്ന ആദ്യ ബിജെപി അംഗം കൂടിയാണെന്ന പ്രത്യേകതയുമുണ്ട്.
നാഗാലാന്‍ഡ് നിയമസഭയില്‍ ഇന്നുവരെ ഒരു വനിതാ എംഎല്‍എ പോലും തെരഞ്ഞെടുക്കപ്പെട്ടിട്ടില്ല. സംസ്ഥാനത്തെ രാഷ്ട്രീയത്തില്‍ ഒരു സ്ത്രീക്ക് മുന്നേറാന്‍ എത്ര ബുദ്ധിമുട്ടാണെന്ന് ഇതില്‍ നിന്ന് വ്യക്തമാണ്. രാജ്യസഭയിലേക്കുള്ള കൊന്യാകിന്റെ തെരഞ്ഞെടുപ്പ് നാഗാലാന്‍ഡിലെ സ്ത്രീകള്‍ക്ക് രാഷ്ട്രീയത്തില്‍ മുന്നോട്ട് വരാന്‍ പ്രചോദനമാകുമെന്നാണ് വിലയിരുത്തപ്പെടുന്നത്.
ഫാങ്‌നോണ്‍ കൊന്യാക് നിലവില്‍ മഹിളാ മോര്‍ച്ചയുടെ സംസ്ഥാന അധ്യക്ഷയാണ്. 2002 ല്‍ ഡല്‍ഹി സര്‍വകലാശാലയില്‍ നിന്ന് ഇംഗ്ലീഷ് സാഹിത്യത്തില്‍ ബിരുദാനന്തര ബിരുദം നേടി. കോളജില്‍ വിദ്യാര്‍ഥി രാഷ്ട്രീയത്തിലും സാമൂഹിക സംഘടനകളിലും ചേര്‍ന്ന് രാഷ്ട്രീയത്തില്‍ സജീവമായിരുന്നു. 2017-ല്‍ ബിജെപിയില്‍ ചേര്‍ന്നു. സ്ത്രീ ശാക്തീകരണത്തില്‍ വിശ്വസിക്കുന്ന പാര്‍ട്ടിയാണ് ബിജെപിയെന്നും പാര്‍ട്ടിയില്‍ വലിയ പ്രതീക്ഷയുണ്ടെന്നും അവര്‍ പ്രതികരിച്ചു.
Discussion about this post